स्वम्ह नेतात छगू हे दबुलिइ दनाः धयादिल - 'पार्टी तज्याइ मखु’

येँ (झीगु स्वनिगः)

एकीकृत नेकपा -माओवादी) या स्वम्ह शीर्ष नेतात म्हिगः विहिवाः छगू हे दबुलिइ दनाः पार्टी गुगु नं हालतय् तज्याइमखु धकाः धयादीगु दु । जनयुद्धकालय् सेनां स्यानाब्यूम्ह माओवादीया तत्कालिन केन्द्रीय दुजः रीतबहादुर खड्काया गुक्वःगु पुण्य तिथिया झ्वलय् रौतहटया गंगा पिपराय् ग्वसाः ग्वःगु ज्याझ्वलय् माओवादीया नायः पुष्पकमल दाहाल प्रचण्ड, न्वकुपिं मोहन बैद्य किरण व डा. बाबुराम भट्टराई नं अथे धयादीगु खः । वय्कःपिन्सं द्वलंद्वः सहिदतय्गु म्हगस पूवंकेत नापं जानताया आकांक्षा कथं हे पार्टीयात छप्पँ यानाः यंकेगु जुइ धकाः प्रतिबद्धता तकं प्वंकादीगु खः । उगु ज्याझ्वलय् नायः प्रचण्डं क्रान्तियात पूवंकेत पार्टी न्ह्याः वनेगु जुइ धयादिसें शान्ति व संविधानया बारे जनताया अनेक शंका उपशंका दुगुलिं जनचाहना कथं हे शान्ति व संविधान निर्माणया नितिं न्ह्याः वनेगु जुइ धयादिल । उगु हे कथं मेम्ह न्वकु बाबुरामं क्रान्तिकारी पार्टीइ सहलह व विचार विमर्श जुइगु स्वाभाविक हे खः धकाः धयादिल ।