स्कूलया विद्यार्थीत च्वनावःगु बसय् आक्रमण, छम्ह घाःपाः

विराटनगर (झीगु स्वनिगः)

विराटनगरया शिव मन्दिर लिकसं स्कूलं छेँय् लिहां वनाच्वंपिं विद्यार्थीतय्त तयाः यंकाच्वंगु अनया सगरमाथा बोडिङ स्कुलया बसय् युवा संघया कार्यकर्तातय्सं आकाझाकां आक्रमण यानाः उगु बसय् च्वनावःम्ह खुगू तगिमय् अध्ययन यानाच्वंम्ह विद्यार्थी अजुर्ृन पोखरेल तसकं घाःपाः जूगु दु । युवा संघ अर्थात युथ फोर्सया केन्द्रीय नायः महेश बस्नेतयात प्रहरीं ज्वनेवं थःपिनि नेतायात त्वःतेमाःगु माग यानाः आक्रमक रुपं प्रस्तूत जुयाः अन सवारी साधन तोडफोड यायेगु झ्वलय् म्हिगः अथे स्कूलया बस नं तोडफोड याःगु खः । उगु घटनाय् लानाः १० दँ दुम्ह पोखरेलयात विराटनगरय् च्वंगु न्यूरो अस्पतालमा वासः यायेगु ज्या जुयाच्वंगु दु । संघया कार्यकर्तातय्सं कयेकूगु अप्पां लानाः पोखरेलया देपापाखेया न्हकुइ च्वंगु क्वँय् हे तज्याःगु दु । अस्पतालय् वय्कःया क्वँय्या अपरेशन याःगु दु ।