युथ फोर्सं परशुराम ज्वनेत ग्वाहालि याइगु

महेश बस्नेतयात त्वःतेगु सहमति

येँ (झीगु स्वनिगः)

पत्रकारयात आक्रमणया घटनाया योजनाकार एमालेया युथ फोर्सया मोरङ जिल्लाया नायः परशुराम बस्नेत थः नाप दु ज्वने फुसा ज्वनां क्यं धकाः प्रहरी प्रशासनयात चुनौति बियाः वयाच्वंम्ह युथ फोर्सया नायः महेश बस्नेतयात म्हिगः विहिवाः सुनसरीया इटहरीं ज्वंगु खःसा परशुराम बस्नेतयात ज्वनेगु नितिं ग्वहालि यायेगु सर्तय् त्वःतूगु दु ।एमालेया युवा नेता योगेश भट्टराईया नेतृत्वय् वंगु पुचलं उपप्रधान नापं गृहमन्त्री कृष्णबहादुर महरालिसे वार्ता यानाः युवा संघपाखें बन्दया ज्याझ्वः मयायेगु अले परशुराम बस्नेतयात ज्वनेगु नितिं ग्वाहालि यायेगु सर्तय् अथे महेश बस्नेतयात त्वःतेगु सहमति जूगु खः । थ्व हे झ्वलय् बस्नेतयात ज्वनेवं युवा संघया कार्यकर्तातय्सं येँय् निगः गाडीइ मि तयाब्यूगु खःसा अथे हे थाय् थासय् तोडफोड यायेगुनिसें विरोध प्रदर्शन तकं याःगु खः । प्रहरीतलिसे थाय् थासय् ल्वापु तकं जूगु खः ।

परशुरामनाप घनिष्ट स्वापू दुम्ह डिएसपी छानविनया घेराय्

पत्रकार खिलानाथ ढकालयात आक्रमण याःगु घटनाया योजनाकार युथ फोर्स मोरङया नायः परशुराम बस्नेत नाप घनिष्ट स्वापू दुम्ह प्रहरी नायव उपरिक्षक -डिएसपी) सहकुल थापाया बारे छानविन यायेगु नितिं म्हिगः विहिवाः स्वम्हेसिया छगू छानविन समिति दयेकूगु दु । एसपी मिङमार लामायात कजि यानाः दयेकूगु उगु समितिया दुजलय् एसपी प्रद्युन्न कार्की व डिएसपी लोकन्द्र श्रेष्ठ च्वनादीगु दु । छानविनया घेराय् लाःम्ह एसपी थापायात म्हिगः हे विराटनगरय् सःते धुंकूगु दु ।

थःगु हे पार्टीया मन्त्रीतय्त घेराउ

एमालेया युवा संघया कार्यकर्तातय्सं नेपालगन्जय् वंपिं निम्ह थःगु हे पार्टीया मन्त्रीतय्त घेराउ याःगु दु । सिँचाइ मन्त्री रघुविर महासेठ व राज्यमन्त्री दलबहादुर सुनवारयात घेराउ याःगु खः । अथे घेराउ याःगुलिं प्रेस चौतारी नेपालया ज्याझ्वः तकं स्यंगु दु । थःपिनि नेता नापं एमालेया कार्यकर्ता महेश बस्नेतयात त्वःतेमाःगु माग यानाः अथे युवा संघ अर्थात युथ फोर्सया कार्यकर्तातय्सं मन्त्रीतय्त घेराउ याःगु खः ।