युथ फोर्स अध्यक्षयात ज्वन
देय्न्यंकं तोडफोड शुरु / थाय्थासय् बन्द
येँ (सन्ध्या टाइम्स)/एमाले समर्थित ल्याय्म्हतय् संगठन युवा संघ नेपाल (युथ फोर्स)या अध्यक्ष महेश बस्नेतयात थौं सुथय् इटहरी लागां प्रहरीं ज्वंगु दु ।
बस्नेतयात ज्वनेवं युवा संघ नेपालया कार्यकर्तातय्सं थाय्थासय् विरोध प्रदर्शन याःगु दुसा येँया घण्टाघर क्वय् नेपाल विद्युत प्राधिकरणया छगः गाडी च्याका बिउगु दु। एमालेया विद्यार्थीतय्सं अन सुथय् बा. १ ञ १८३३ नम्बरया बसय् मि तया बिउगु खः। अथे हे विराटनगरय् शिव मन्दिर लिकसं सगरमाथा बोर्डिङ स्कूलया विद्यार्थीत च्वनावःगु बसय् आक्रमण यानाः छम्ह विद्यार्थीयात घाःपाः याना बिउगु दु ।
घाःपाः जूम्ह विद्यार्थी अर्जुन पोखरेलयात कोशी अञ्चल अस्पताल यंकाः वासः यायेगु ज्या जुयाच्वंगु दु। इटहरी लागाय् युवा संघया कार्यकर्तातय्सं खुगलं मल्याक गाडी तोडफोड याना बिउगु दु। अथे हे गाडी तोडफोड यानाः बिउगु विरोधय् एमालेया हे यातायात मजदुर व यातायात व्यवसायीतय्सं इटहरी लागाय् चक्का जाम याना बिउगु दु ।
एमाले अखिलया विद्यार्थीतय्सं थौं सुथंनिसें हे युवासंघ नेपालया अध्यक्षयात त्वःतेमाःगु माग यासें येँया त्रिचन्द्र क्याम्पस, अस्कल क्याम्पस लागाय् तकं प्रदर्शन याःगु दु। अथे हे नलपरासीया गैंडाकोटय् नं युवा संघया कार्यकर्तातय्सं प्रदर्शन याःगु दु। अन नारायणगढ-बुटवल सडक खण्डय् यातायात बन्द याःगु दु। अथे हे विराटनगरय् बजाः, पसः, शिक्षण संस्था व कलकारखाना तकं बन्द याःगु दु ।
थ्व हे दथुइ एमालेया भ्रातृ संगठन अनेरास्ववियुया महासचिव किशोरविक्रम मल्लं आः देय्न्यंकं हे आन्दोलन यानाः मि च्याका बी धकाः ख्याच्वः बियादीगु दु। वय्कलं धयादिल, 'एमालेया फुक्क जनस्तरया संगठनत सतकय् कुहां वयाः विरोध यायेगु जुइ, फुक्क थासय् मि च्याइ।'थ्व हे दथुइ युवा संघ नेपालं नेपाःया पूर्वी लागा बन्द आह्वान याःगु दु ।
पत्रकारयात आक्रमण याःगुलिं प्रहरीं मालाच्वंम्ह पर्शुराम बस्नेत थःनाप हे दु धासें वयात ज्वने फुसा ज्वनाः क्यँ धकाः सार्वजनिक रुपं हाथ्या बिउगुलिं अध्यक्ष महेश बस्नेतयात ज्वंगु खः ।
