'राज्य पुनर्संरचना हीके फइ मखु'

येँ (सन्ध्या टाइम्स)/राज्य पुनर्संरचना तथा राज्य शक्ति बाँडफाँड समितिं तयार यानाछ्वःगु १४ प्रदेश दुगु प्रतिवेदनयात विवादास्पद धइगु नामय् न्ह्यागु हे उपसमिति वा कार्यदलय् यंकूसां उकियात संशोधन याये मफइगु खँ उगु समितिया सभापति लोकेन्द्र बिष्ट मगरं धयादीगु दु ।

थौं 'सन्ध्या टाइम्स'लिसे खँ ल्हासें वय्कलं उगु प्रतिवेदनय् विवाद दु धयाच्वंगु खँ फुक्क नाटक जक खः धासें उकी वास्तवय् अज्याःगु छुं हे विवाद मदुगु नं दावी यानादिल। उगु प्रतिवेदनय् उल्लेख जुयाच्वंगु प्रदेशया संख्या, राजनीतिक अग्राधिकार व स्वायत्त क्षेत्र जक बहुमतं पारित यानागु व मेगु फुक्क हे बुँदा सर्वसम्मतं पारित जूगुलिं उकी छुं हे विवाद मदुगु खँ वय्कलं कनादिल। संवैधानिक समितिं थुकी ७८ गू विवाद दु धाःगु खःसां आः वयाः २६ बुँदाय् विवाद दु धयाहःगु नं नाटक जक खः धकाः नं वय्कलं धयादिल ।