जंगली कःनि नयाः स्वम्ह तःकेहेँ सित
येँ (सन्ध्या टाइम्स)/पुर्वी पाल्पाया गोठादी गाविस वडा नं. ८ या भुटुके धइगु थासय् जंगली कःनि (सर्प कःनि) नयाः छखा हे छेँया स्वम्ह तःकेहेँ सीगु दु। जंगली कःनि नयाः गुदँ दुम्ह बुमबहादुर दर्लामी, न्हय्दँ दुम्ह दिलमाया दर्लामी व प्यदँ दुम्ह विक बहादुर दर्लामी सीगु खँ स्थानीय प्रहरीं धाःगु दु ।
जंगलं हःगु कःनि नयाः इपिं छेँय् हे सीगु खः। उगु कःनि नयाः मांम्ह जेनिसरा दर्लामी धाःसा सिकिस्त जुइक विरामी जूगु दु। जेनिसरायात तानसेन प्रभास लागा लुम्बिनी मेडिकल कलेजय् वासः याकाच्वंगु दु। सीपिं मस्तय् अबुम्ह थमबहादुर दर्लामीं धाः कथं जंगली कःनिया तरकारी दयेकाः नयेवं फुक्क हे छेँजःपिनि प्वाः तग्वः जुयावःगु खः। लिपा फुकसितं वाक्वाक् वःगु इकुल धया हःगु खः ।
घटना बारे थुइकेत प्रहरी सहायक निरिक्षक बाबुराम घर्तीया नेतृत्वय् प्रहरीया छगू पुचः घटनास्थलपाखे वंगु दु ।
