नेवाः प्रदेशया पलेसा राजधानी प्रदेश?

राज्य पुनर्संरचनाया खँय् जुयाच्वंगु विवादं मेपिंत उलि तःधंगु हानी मयाःसां नेवाःतय्त धाःसा बांमलाक हे प्रभावित याइगु संकेत खने दया वःगु दु। राज्य पुनर्संरचनाया लागिं पारित हे याना तयेधुंकूगु प्रस्तावयात तकं आः तोडमरोड यानाः उकी उल्लेख जुयाच्वंगु नेवाः प्रदेशया अस्तित्व हे मदयेकेगु कुतः जुयाच्वंगु आभास पिहां वःगु दु। देय्या राजधानी समेत दुगु ल्याखं नेवाःतय् थुगु आदिभूमियात नेवाः प्रदेश मयासे राजधानी प्रदेश दयेकेमाःगु प्रस्तावत उखेंथुखें चाःहीकाः वयाच्वंगु दु। खास यानाः नेपाली कांग्रेस दुने नेवाः प्रदेश सिबें नं राजधानी प्रदेशया अप्वः चर्चा जुयाच्वंगु खँ न्यने दयाच्वंगु दु। थज्याःगु चर्चायात अन दुने च्वंपिं नेवाः कार्यकर्तातय्सं विरोध क्यँसें मेमेगु फुक्क जातिया नामं प्रदेश दइगु खःसा नेवाःतय्त नं प्रदेश दयेमाः धकाः माग यानाच्वंगु सुखद बुखँ नं मवयाच्वंगु मखु ।

थज्याःगु खँयात विरोध यानाच्वंपिं नेवाः न्ह्यलुवातय्गु छगू प्रतिनिधिमण्डलयात माओवादी अध्यक्ष प्रचण्डं राजधानी प्रदेश थेंज्याःगु अवधारणायात थःपिंसं स्वीकार याये फइ मखु धकाः बचं बियादीगु खँ नं पिहां वःगु दु। थ्व सकारात्मक खँ खः। राज्य पुनर्संरचना मामिलाय् न्ह्यलुवा जुयाच्वंगु पार्टीया ल्याखं माओवादीपाखें उकी अडान कया बिल धाःसा नेवाः प्रदेशया मुद्दा राजनीतिक रुपं बल्लाइगु खँय् विवाद मदु। तर थन ला राजनीतिक पार्टीतय् दथुइ 'लचकता' व 'सहमति'या नामय् धमाधम हे अडानत त्वःता वनेगु चलन शुरु जूगुलिं नेवाःतय् थ्व अहम् मुद्दायात नं बलि बीगु खः लाकि धइगु चिन्ता जुयाच्वंगु दु। दलत थ्व मुद्दाय् अडिग जुया हे च्वनेमाः ।

More Stories Like this