रामदेवया योगय् शंका

बाबा रामदेवं जब न्हूदिल्लीइ अनसन शुरु यानादिल आपालं मनूतय्सं अनुमान याःगु खः कि योग गुरुया थ्व अनसन छुं वाः अथवा लछि तक ला न्ह्याइ जुइ। तर उमिगु थ्व अनुमान याकनं हे गलत साबित जुल। अनसन च्वंगुयां छुं न्हि लिपा हे योग गुरुया स्वास्थ्य स्यना वन। कपालभाटी क्रियाया गुरुयात आईसीयुलय् यंकाः भर्ना याये माल। छुं न्हि लिपा हे अनसन त्वाः थले माल। फुक्कं यानाः मुक्कं गुन्हुया दुने थ्व पूरा प्रक्रिया हे क्वचाल ।

अले थुकिं यानाः योग स्यनीपिं सम्पूर्ण गुरु व शिष्यपिनि दथुइ योग व योग गुरु बारे हे छगू बांमलाःगु छाप लाका थकल। योग यात धाःसा थीथी कथंया लाभ जुइ धइगु धापूयात बाबा रामदेवया स्यना वंगु स्वास्थ्यं तःधंगु हे शंकाया घेराय् लाका बिल ।

योगाचार्य राकेश कुमारयात थः हे शिष्यतय्सं योगया बल बारे आपालं न्ह्यसः तया हल। राकेश कुमारपाखें योग स्यनाच्वंम्ह शिष्य पल्लवी मलहोत्रां रामदेवया अनसन प्रकरणं योगया विश्वनीयतायात क्षति याना बिउगु बिचाः प्वंकल ।

भारतया आपालं सन्तत छुं हे मनसे ताः ई तक हे म्वानाच्वंगु दसि दु। आः नकतिनि हे स्वामी निगमानन्द (गंगा खुसि सफा याये माल धइगु माग यासें) ६८ न्हु तक अनसन च्वनाः सिना वन। मेम्ह योग शिष्य भारती शर्मां नं छगू आशंका प्वंकल। बाबा रामदेवं योगया बारे गुलि नं खँ कर्पिन्त स्यनीगु खः, व वय्कः थम्हं हे अभ्यास मयाः लाकि धइगु वयागु शंका दु ।

'जब मनूतय्सं पत्याः याइ मखु झीसं छु लिसः बीगु? निगमानन्द जक मखु रामदेव स्वयां नं बुरापिं आपालं अज्याःपिं मनूत दु गुपिं छुं हे मनसे ताः ई म्वाना वंगु दु।' वयागु धापू खः ।

अथे हे मेम्ह छम्ह योगीया धापू कथं रामदेवं अनसन ताःहाकः न्ह्याके मफुगुया कारण योग सिबें नं वय्कःया मानसिक अवस्था खयेमाः। अभिप्लाभा योगा स्यनीम्ह गरिमा बत्राया धापू कथं योगया स्वापू अनसनलिसे मदु, थ्व मनोबललिसे स्वाःगु विषय खः गुगु रामदेवयाके मदु धइगु सी दत। 'व स्वयां ला बरु निगमानन्दं थःगु मनोभावनायात नियन्त्रण यानाः थःगु शारीरिक तनावयात ताः ई तक बसय् कया तल। मसिउ, थ्व प्रकरण लिपा आः ग्वःम्हेस्यां रामदेवयात योग गुरु माने याइ !' गरिमां धाइ ।

रामदेवया सतीम्ह सहयोगी जयदीप आर्यया तर्क धाःसा मेगु हे दु। अनसन च्वंगु इलय् गुकथंया तनावपूर्ण स्थिति सिर्जना जूगु खः उकिं यानाः हे रामदेवया स्वास्थ्य स्यनावंगु वय्कःया दावी दु। वय्कःया धापू कथं योग गुरुया 'स्टामिना' ला उच्च हे खः तर प्रहरीपाखें जूगु अश्रुग्याँस प्रहार, १० घण्टा तक हिरासतय् तयातःगु आदि कारणं यानाः बाबाया स्वास्थ्यय् लिच्वः लाःगु खः ।

योग गुरु कुमारं छगू तःधंगु तर्क तइ, योगं शरीरलिसे सराकोर तइगु धइगु सामान्य रुपं जक खः। योगया मुख्य सरोकार मानसिक सन्तुलन खः। छक्वः थथे याये फत कि शरीर धइगु ला छगू साधन जक जुइ। प्राचीनकालयापिं योगीत अझ दुने थ्यंक दुहां वनाः ब्रम्हाण्डया शक्तियात तकं ग्रहण याना वंगु दु। थुकिया लागिं दँ दँ तक अभ्यास यायेमाः ।'

(टाइम्स अफ इण्डिया अनलाइन)

More Stories Like this