नासा क्वाटर फाइनलय् थ्यन

येँ (झीगु स्वनिगः)

नासा 'ह्वाइटहाउस कप’ प्यक्वःगु यु - १९ राष्ट्रिय बास्केटबल कासा अन्तर्गत मिसापाखे बुधबाः क्वाटर फाइनलय् दुहांवंगु दु । राष्ट्रिय खेलकुद परिषद् -राखेप) या कभर्ड हलय् जूगु समूह 'बी’ या लिग कासाय् नासां साइपलयात ४७ - २२ ल्याखं बुकाः कासा त्याकूगु खः । नासायात त्याकेगु नितिं रोनाही लिम्बुं २२ अंकया योगदान याःगु खः । समूह उपविजेताया हैसियतं साइपल नं क्वाटर फाइनलय् थाय् पक्का जूगु दु । मिसापाखे हे लिपांगु च्यागुलिइ थाय् दयेकेधुंकूगु पुचः ह्वाइटहाउस व प्राइमदथुइया कासाय् ह्वाइट हाउस ३३ - २२ ल्याखं त्यागु खः ।

हवाइटहाउसया मेरिना केसीं च्यागू स्कोर याःगु खः । कासा त्याकाः ह्वाइटहाउस समूह 'ए’ या त्याकूगु पुचः जूगु खः । क्वाटरफाइनलय् ह्वाइटहाउसया धेंधेंबल्लाः निम्सलिसे जुइसा प्राइमं मोर्गनलिसे म्हिती । मेमेगु क्वाटरफाइनल नासा व सीसीआरसी लिसे साइपल व नोबलदथुइ जुइ । नेपाल बास्केटबल संघपाखें याःगु कासाय् मिजंपाखे सुनसरी, प्राइम व कास्की लिपांगु १६ य् थ्यंगु दु । सुनसरीं काभ्रेयात ५२ - ४१ ल्याखं बुकूगु खः । सुनसरीया हेमन्त राईं १९ अंक काःगु खः । आयुष सिंहया १६ अंकया ग्वाहालिइ प्राइमं टि्रनिटीयात ६४ - ३१ या सहज रुपं कासा त्याकूगु खः । म्याग्दी विरुद्धया कासाय् कास्की ७० - ४२ या अन्तरं त्यागु खःसा कास्कीया कृष्ण पुनं २३ अंक काःगु खः । कासा थौं मिजंया पि्रक्वाटर फाइनल धेंधेंबल्लाः कासा जुइ ।

More Stories Like this