छुं दिंदुने हे लोडसेडिङ अन्त्य जुइः ऊर्जामन्त्री

येँ (झीगु स्वनिगः)

ऊर्जामन्त्री गोकर्ण विष्टं छुं दिंदुने हे लोडसेडिङ अन्त्य जुइगु घोषणा यानादिल । छगू साक्षात्कार ज्याझ्वलय् न्वंवानादिसें मन्त्री विष्टं विद्युत चुहावट नियन्त्रणया ज्या प्रभावकारी रुपय् न्ह्यःने न्ह्याःगुलिं छुं दिंदुने हे लोडसेडिङ अन्त्य जुइगु दाबी यानादीगु खः । ख्वपय् छुं दिंया कुतलय् हे न्ह्यगू प्रतिशत चुहावट नियन्त्रण जूगु तथ्यांक न्ह्यःब्वयादीम्ह मन्त्री विष्टं नेपालय् जुइगु कूल विद्युत चुहावटया खुगू प्रतिशत जक नियन्त्रण यायेफुसां विद्युत प्राधिकरणयात निगू त्या अर्ब तका नाफा जुइगु जानकारी बियादिल । आःथें हे ज्या जूसा स्वदायादुने नेपाः पूर्ण रुपं लोडसेडिङ मुक्त जुइगु वय्कःया दाबी खः । निर्माणाधिन विद्युत आयोजनायात सरकारं पूर्ण सुरक्षा बिइगु धयादीम्ह वय्कलं माःगु कथं प्रहरी, सशस्त्र व नेपाली सेनाया सुरक्षा उपलब्ध याकेगु तयारी जुयाच्वंगु खा नं वय्कलं न्ह्यथनादिल ।

ऊर्जा मन्त्रालयं सेना परिचालनया नितिं रक्षा मन्त्रालययात इनाप यायेधुंकूगुलिं वइगु मन्त्री परिषद्या बैठकं आयोजनाया सुरक्षाय् सेना परिचालनया निर्णय याइगु नं मन्त्री विष्टं जानकारी बियादिल । जलविद्युत आयोजनाय् अवरोध यायेगु ज्यायात सरकारं छु नं हालतय् छुट मबीगु वय्कःया धापू खः । माथिल्लो कणर्ाली, पश्चिम सेती, माथिल्लो अरुण, बुढी गण्डकी लगायतया आयोजना शुरु यायेत थीथी स्वदेशी व विदेशी वित्तीय संस्थातलिसे सहलह जुयाच्वंगु नं वय्कलं न्ह्यःथनादिल । थ्वहे दथुइ पुनरावेदन अदालत नेपालगञ्जं नगरय् बिद्युत कटौती याःगुया कारणलिसे न्यान्हुयादुने उपस्थित जुइत नेपाल विद्युत प्राधिकरणयात उजं ब्यूगु दु । अदालतं प्राधिकरणया वितरण शाखा, मध्यपश्चिम क्षेेत्रीय ज्याकू व बााके जिल्ला प्रशासन ज्याकूयात कारणलिसे सहलहया नितिं अदालतय् उपस्थित जुइत जानकारी ब्यूगु खः ।
पुनराबेदन अदालतया न्यायाधीश रमेश पोखरेलया याकः इजलासं लोडसेडिङ बिरुद्ध कानून ब्यवसायीं निषेधाज्ञा व परमादेशया माग यानाः ब्यूगु रिट उपर सुनुवाई यानाः उगु उजं पिथंगु खः ।

प्राधिकरणया थीथी ज्याकूत, ऊर्जा मन्त्रालय, जिल्ला प्रशासन ज्याकू लगायत झिंनिगू सरकारी ज्याकू व प्रमुखयात विपक्षी दयेकाः अधिवक्ता लोकबहादुर शाहं निन्हु न्ह्यः रिट दायर याःगु खः । भारतपाखें आयात याइगु बिद्युत प्रशारणय् नापं कटौती जुइवं वैशाख २३ गतेनिसें न्हिं प्यघौ विद्युत कटौती जुयाः वयाच्वंगु खः । प्राधिकरणं धाःसा भारतपाखें आयात याइगु बिद्युत प्राबिधिक कारणबश कटौती जूगु यानाच्वंगु जानकारी बिइगु यानाच्वंगु खः ।

More Stories Like this