नेवाः प्रदेशयात वन्द मुक्त प्रदेश दयेकेमाः

हानं छक्वः वन्दया हल्ला वःगु दु । छगू चीधंगु दलं नेपाः वन्द यायेगु हल्ला पिकया वं स्वनिगःया नेवाःत अलमलय् यानाविल । वन्दहे जुइगु खःला ? वन्द यायेफैगु खःला ? वन्दहे जुइगु खःसा थःपिन्त मदयेक मगाःगु सामानत मुंकेगुपाखे ब्वांय् जुल । ई ब्यः मदयेक मीदया पसलेतय्त न्ह्याइपुकेगु ज्या जुलसा ध्यबा भचा अप्वःहे पुलेमाःसां थःयात माःगु सामान न्यायेदयाः गाहाकित नं दंग । अथ्यला म्हिगःया वन्दया हल्ला वःथें वन्दनं लित काल धाइ । तर छता खँय् नेवाःतय्सं आः ध्यान वीमाःगु दु नेवाः प्रदेश दुने वन्द विरोध याये दइ कि दैमखु । यायेहेमाःसा नेवाःतय्गु लागा दुने वयाः मखु, थःथःगु लागाय् वनाः विरोध वन्द यात पनेमाल, नेवाः प्रदेश दुने उज्वःगु ज्याखँयात निशेधित यायेमाल । वन्द विरोध यायेगु मनूतय्गु अधिकार खः । थःथःगु माग पूवंकेगु छगू जक माध्यम धयागु वन्द, विरोध, जुलुस, आन्दोलन खः । तर उकियात प्रयोग यायेगु कार्यक्षेत्र धयागु नेपाः न्यंक जुइमखु । आन्दोलन तच्वयाः जिल्लां अञ्चल व अञ्चलं अधिराज्यव्यापी नं जुइफु । तर अथ्य मजुसे छथाय् जूगु घटनायात मेमेथाय् यंकाः जवरजस्ती स्वाकेगु यायेमज्यू । विषयरुपं स्थानिय जनतानाप स्वापूहे मदुगु विषयलय् जवरजस्ती स्वाकाः वन्द यायेगु, विरोध यायेगु ज्यायात स्वनिगः दुनेया नेवाः लागाय् पूर्णत वन्देज तयेमाः । नेवाः प्रदेशय् सरोकार थनया नेवाःत जूगुलिं थनया वन्द व विरोधया खँ नं थनया नेवाःतय्त प्रत्यक्ष प्रभाव त्वःती । तर थ्व प्रदेशया कार्यकर्ता व सरोकारवाला नेवाःत जूगुलिं नेवाःतय्गु हित विपरित छुंनं ज्यायात नेवाःतय्सं व्यागलं च्वनेगु पाय्छि मखु ।

नेवाःत थनया आदिवासी जनता जक मखु थुगु प्रदेशया सरोकार वालात नं जूगुलिं नेवाःत नाप असवन्धित ज्यां नेवाःत थौं मुकदर्शक जक जुया च्वने मज्यू । प्रत्यक्ष वा अप्रत्यक्ष उकी ल्हाः तयेहेमाः ।
सुनां याइगु वन्द विरोधं नेवाःतय्त फाइदा जुइ लाकि वेफाइदा ? थ्व विषययात कयाः वादविवाद यायेगु स्वयाः नेवाः प्रदेश वन्द मुक्त प्रदेश घोषणा यायेमाः । घोषणा जक याना नं मगाः, वन्द विरोधयात कयाः नेवाःतय्गु राष्ट्रियस्तरया संस्थां उकियात कयाः व्यवस्थित धंगं सम्वोधन यायेमाः । नेवाःतय्गु समर्थन मदुगु छुंनं वन्द विरोधी ज्याय् मालीवलय् माःकथं प्रतिरोध नं यायेफयेमाः । थथ्य यायेफत धाःसा झीगु नेवाः स्वायत्त प्रदेश सम्वन्धी मनूतय्गु धारणा क्वाःतुया वनी व स्वायत्तताया विरोधीतय्त आवश्यकताकथं लिसः नं बीफै । मखुसा नेवाः प्रदेशय् वयाः न्ह्यःने लाःथे यायेगु व याकेगु जुल धाःसा नेपाली कांग्रेसं नेवाःतय्गु नेवाः स्वायत्त प्रदेश क्वाप्प नयाव्यूथें मेमेगु दल व संघसंस्थातय्सं यायेगु हिम्मत यायेफैमखु । नेवाः प्रदेश दुने नेवाःतय्गु हित व इच्छा वेगर सुनां छुंनं यायेगु विचाः तकं यायेफैमखु । प्रदेशया सुनिश्चितताया नितिं थ्व पलाः ल्होनेफयेमाः ।

More Stories Like this