चलखेल यायेत प्रणव मुखर्जी वइगु

- स्वराज महर्जन -

नेपाःया राजनीति झन झन तरल जुजुं वनाच्वंगु नापं भारतं चाहाना याःगुसिबें अःखः जुयाच्वन धकाः तायेकाः भारतया उच्च स्तरया नेता अर्थमन्त्री प्रणव मुखर्जी हे नेपालय् वइगु जूगु दु । प्रधानमन्त्री चुनावय् थःपिन्सं चाहाना यानाथें मजूसे माओवादीया समर्थनय् एमालेया नायः झलनाथ खनाल वःगु, संविधानसभाया म्याद थप याये न्ह्यः मधेसवादी दलतय्त तछ्यानाः प्रधानमन्त्री खनालयात राजीनामा बिइकेगु कुतः यातं नं असफल जूगु तायेकाः हीमी चायाच्वंगु भारतया संस्थापन पक्षया उच्च तहया नेता नापं भारतया प्रधानमन्त्री मनमोहन सिंहया तसकं विश्वास पात्र जुयाच्वंम्ह वय्कः नेपाः भ्रमणय् वयेत्यंगुयात मनूतय्सं तसकं अर्थपूर्ण रुपं कयाहःगु दु ।

२०६२/०६३ सालया जनआन्दोलनया नितिं न्हय्गू दल व माओवादीया दथुइ १२ बुँदाया दिल्लीइ सहमति याकेगु नितिं महत्वपूर्णगु भूमिका म्हितादीम्ह वय्कः नेपालय् निन्हुया भ्रमणय् वयाः राजनीतिक दलया नेतात नापं राष्ट्रपति व प्रधानमन्त्रीयात तकं नापलानाः वनीगु जूगु दु । न्हापा एकीकृत माओवादीया नायः पुष्प कमल दाहाल प्रधानमन्त्री जुयादीगु इलय् प्रधानसेनापति रुकमाङगत कटवालयात कारवाही याःगु इलय् एमालेया नायः झलनाथ खनालं समर्थन यानादीगु खःसा लिपा फोन यानाः हथासं समर्थन लित कयाः प्रधानमन्त्री प्रचण्डं राजीनामा बिइमाःगु अवस्था ब्वलंकाब्यूम्ह नं भारतया थौंकन्हय्या अर्थमन्त्री प्रणव मुखर्जीं खः अर्थात वय्कलं हे फोन यानादीगु खः । भारतं आः तक नं प्रधानमन्त्री खनालयात थःगु पक्षधरयाम्ह मखु धकाः भारत भ्रमणय् सःताः मच्वंगु अवस्थाय् छुं दिं न्ह्यः जक पाकिस्तान व चीनं प्रधानमन्त्री खनालयात थःथःपिनिगु देय् भ्रमणया नितिं निमन्त्रणा ब्यूगुलिं नं हथाय् चायाः वय्कः मुखर्जी नेपाल भ्रमणय् वयेत्यंगु खः ।

वइगु शनिवाः येँय् थ्यंकः वइम्ह वय्कः मुखर्जीयात औपचारिक रुपं निमन्त्रणा धाःसा उपप्रधानमन्त्री नापं अर्थमन्त्री भरतमोहन अधिकारीं बियादीगु खः । थ्व फुक्क कथंया घटनाक्रमयात स्वल धाःसा छखे माओवादीयात साइज घटेयायेगु, भारतपक्षधर कांग्रे, पुलांपिं राजसंस्थावादी नापं मधेसवादी दलतय्त छथाय् हयेगु, प्रधानमन्त्री खनालयात ख्यायेगु अले चीन व पाकिस्तानं नेपाःया ममिलाय् ल्हाः तयाः न्ह्यःने लातधाःसा भारतं नेपालय् चलखेल याये थाकुइफु धकाः तायेकाः नेपालय् राजनीतिक चलखेल यायेत हे हथासं भारतीय सरकारया प्रतिनिधि कथं लिपांगु इलय् दक्ले उच्च तहया नेता अर्थमन्त्री तकं जुयादीम्ह प्रणव मुखर्जी नेपाः भ्रमणय् वयेत्यंगु खः धकाः धाःसां छुं पाइमखु ।