संवैधानिक समितिया सभापतिं प्रमया राजीनामा फ्वन

येँ (झीगु स्वनिगः)

न्हूगु संविधान निर्माणया नितिं संविधानसभाया थीथी समिति मध्ये दक्ले महत्वपूर्णगु व जिम्मेवारीपूर्ण समिति कथं नालातःगु संवैधानिक समितिया सभापति निलाम्बर आचार्यं प्रधानमन्त्री झलनाथ खनालं राजीनामा बिइमाः माग यानादीगु दु । संविधान निर्माणया झ्वलय् विषयगत समितितपाखें तयार याःगु मस्यौदायात दुथ्याकाः संविधानया एकीकृत मस्यौदा दयेकाः जनतायाथाय् यंकेगु थें जाःगु महत्वपूर्णगु भाला दुगु संवैधानिक समितिया सभापति आचार्यं तकं प्रधानमन्त्रीया राजीनामा माग यानादीगुलिं मनूत अजूचाःगु दु । न्हूगु संविधानया नितिं सहमतिया लकस ब्वलंकाः वनेमाःम्ह वय्कः सायद् नेपाली कांग्रेसया नेता जूगुलिं कांग्रेसया लाइन कथं हे अथे प्रधानमन्त्रीया राजीनामाया माग यानाः संविधान निर्माणया ज्यायात ध्याकुनय् लाकेगु खेल जकं यानाः न्ह्याः वनादीगु मखुला धकाः मनूतय्सं न्ह्यसः तयाहःगु दु । संवैधानिक समितिया सभापति निलाम्वर आचार्यं म्हिगः बुधवाः साक्षात्कार ज्याझ्वलय् न्वंवासें अथे प्रधानमन्त्रीया राजीनामा माग यानादीगु खः । शान्ति, संविधान व सरकार छगू नाप मेगु स्वानाच्वंगुलिं प्रधानमन्त्री खनालं राजीनामा बियाः सहमतिया सरकार दयेकेमाः धकाः वय्कलं धयादीगु खः ।