'१४ प्रदेशयात त्वतेगु अधिकार मदु’
येँ (झीगु स्वनिगः)
संविधानसभाया राज्य पुनरसंरचना नापं राज्य शक्ति बाँडफाँट समितिया सभापति लोकेन्द्र विष्ट मगरं नियमावलीइ दुगु कार्यविधिया अःखः संवैधानिक समितिं मेमेगु समितिया मस्यौदा प्रतिवेदनयात तोडमोड यात धकाः द्वपं बियादीगु दु । विषयगत समितिया मस्यौदा प्रतिवेदनयात 'कम्पाइल' यानाः संविधानया एकीकृत मस्यौदा तयार यायेगु जक संवैधानिक समितिया जिम्मेवारी खः धकाः वय्कलं धयादिल । माओवादीया पोलितब्यूरो दुजः विष्ट मगरं संविधानसभा सचिवालय सिंहदरवारय् म्हिगः बुधवाः संचारकर्मीतलिसे खँल्हासें अथे धयादीगु खः । वय्कलं बहुमतं पारित याःगु प्रतिवेदनयात तोडमोड यायेगु हैसियत संवैधानिक समितियाके मदु धकाः नं स्पष्ट यानादिल ।
राज्य पुनर्संरचना समितिपाखें प्रस्तावित १४ प्रदेशया प्रस्ताव भच्चा च्वय्क्वय् यायेगु हैसियत संविधानसभाया पूर्ण मुँज्या बाय् जनतायाके दु धकाः नं तर्क तयादिल । १४ प्रदेशया प्रस्तावयात न्हापांगु मस्यौदाय् दुथ्याकाः जनताया राय सुझावया आधारय् हिलेगु बांलाइ धकाः नं धयादिल । वय्कलं राज्यपुनर्संरचना यायेगु इलय् प्रदेश दयेकेगु, राजनीतिक अधिकार बिइगु ला कि मबिइगु नापं स्वायत्त प्रदेश सम्वन्धी स्वंगू जक विवाद दुगु जूसां मेमेगु प्राविधिक विषययात नं विवाद धकाः हःगु खँय् आपत्ति प्वंकादिल ।
