नेवाः प्रदेश सुनिश्चित

येँ (झीगु स्वनिगः)

संविधानसभाया दक्ले तःधंगु दल एकीकृत नेकपा (माओवादी)या नायः पुष्प कमल दाहाल प्रचण्डं न्हूगु संविधानय् नेवाः स्वायत्त प्रदेश सुनिश्चित जुइ धकाः धयादीगु दु । नेवाः स्वायत्त राज्यया नितिं संघर्ष यानाः वयाच्वंगु नेवाः स्वायत्त राज्य मंकाः संघर्ष समितिया प्रतिनिधिमण्डल म्हिगः बुधवाः प्रचण्ड निवास नयाँ बजारय् वनाः ज्ञापन पौ लःल्हाःगु इलय् वय्कलं अथे धयादीगु खः । जातीय पहिचानया आधारय् जातीय स्वायत्तता व स्वशानया विरुद्ध षडयन्त्र जुयाच्वंगु दु धयादिसें थःपिं जनयुद्ध कालंनिसें हे उत्पीडनय् लानाच्वंपिनिगु अधिकारया नितिं ल्वानाः वयाच्वनागु खँ न्ह्यथसें संविधानसभाया राज्य पुनर्संरचना समितिं तयार याःगु १४ प्रदेशया प्रस्तावं लिहां वनेगु जुइमखु धकाः नं धयादिल । आदिवासी जनजाति, उत्पीडित जाति व समुदायया अधिकारया नितिं ल्वानाः हे माओवादी पार्टी थ्व अवस्थाय् थ्यंगु खः धयादिसें नायः प्रचण्डं थुगु मुद्दायात त्वःतल धाःसा माओवादी पार्टी हे सिधइ धकाः नं स्पष्ट यानादिल । आः तकया दुने न्हूगु संविधान निर्माणया नितिं लचकता क्यनाः चिचीधंगु खँ थःपिन्सं त्वःताः च्वनागु धैगु हे राज्य पुनर्संरचना थें जाःगु नापं आदिवासी जनजाति, दलित, मुस्मां, मधेसी नापं उत्पीडनय् लाना च्वंपिनिगु मुक्तिया विषययात हे ज्वनाः न्ह्याः वना च्वनागु खः धकाः नं वय्कलं धयादिल ।

जातीय स्वायत्तता नापं स्वशासन मबिइगु नितिं देशी विदेशी षडयन्त्र जुयाच्वंगु थ्व अवस्थाय् उत्पीडित जाति मध्ये नं दक्ले विकसित जाति जूगुलिं आःया अवस्थाय् सचेत जुयाः च्वना च्वनेत नापं छप्पँ छधी जुयाः स्वनिगःया आदिवासी नेवाःतय्सं माःगु कथंया भूमिका म्हितेत इनाप तकं यानादिल । वय्कलं आत्मनिर्णयया अधिकार, जातीय स्वायत्तता, स्वशासन, अग्राधिकारया सवालय् गुगु नं हालतय् माओवादीं सम्झौता याइमखु धकाः नं धयादिल ।