लिम्बुयात कडा स्पष्टीकरण

कन्हय् तकया दुने नेवानिं लिकाइगु सम्भावना

येँ (सन्ध्या टाइम्स)/कार्यकारी अधिकार ल्हातय् लायेसातकि थः ययःथे हे ज्या यानाच्वंम्ह नेपाल वायुसेवा निगमया महाप्रवन्धक केबी लिम्बुयात चीकेगु लागिं सरकारं प्रक्रिया शुरु याना हःगु दु। थ्व झ्वलय् उड्डयन मन्त्रायलयपाखें वय्कःयात छपु कडा पौ च्वसें स्वन्हुया दुने लिसः बिउ वा धकाः स्पष्टीकरण न्यंगु दु। पती बियातःगु स्वन्हुया म्याद थौं फुइत्यंगु दु। वय्कलं थौं न्हिनय् तक उकिया लिसः छ्वःगु मदुनि। यदि लिसः मछ्वल धाःसा वय्कःयात चीकीगु ला निश्चित हे जुल। छुं जुयाः लिसः छ्वल हे धाःसां नं लिसः 'चित्त बुझे मजू' धासें वय्कःयात चीकीगु सम्भावना दुगु खँ सूत्रं धाःगु दु। वंगु जेठ २९ गते च्वयातःगु उगु पती स्वन्हुया दुने लिसः बीत निर्देशन बियातःगु दु ।

मन्त्रालयं वय्कःयात च्वयातःगु पती विवरण धाःसा अतिकं कडा रुपं उल्लेख यानातःगु दु। उकी थःके द हे मदुगु अधिकार प्रयोग यानाः ज्यालादारी कर्मचारी नियुक्त याःगु, सरुवा बढुवा याःगु, कर्मचारीतय्त विभागीय कारवाही याःगु, विगतय् कर्मचारीया ट्रेड युनियन गठन यायेत कर्मचारी हे मखुपिं मनूतय्त तकं कर्मचारी धकाः फय्गं विवरण प्रमाणित याःगु, आः नकतिनि विशेष अदालतं सफाई काःम्ह कार्यकारी अध्यक्षयात हाजिर याकेत मन्त्रालयं बिउगु निर्देशनया पालना मयासे अध्यक्षया क्वथाय् तालं ग्वया बिउगु द्वपं बियातःगु दु ।

अथे हे लिपांगु इलय् निगमया ९-एन एसीएया जहाजं पार्टपुर्जा सहितया टुलकिट तंगु बारे मन्त्रालययात छुं हे जानकारी मबिउगु, करिब प्यला न्ह्यः साढे ४ करोड तका बराबरया पार्टपुर्जा सहितया टुलकिट तंबलय् नं महाप्रवन्धकं उकिया मालेज्याय् चिउताः मतःगु धकाः थ्व सम्बन्धी छानबिन समितिं प्रतिवेदन बिउगु खँ न्ह्यथँसें 'छितः महाप्रवन्धक पदय् बहाल याना तयेगु पाय्छि खनेमदुगु' धकाः च्वयातःगु दु। थ्व निर्णय मन्त्रिपरिषदं हे याःगु जूगुलिं लिम्बु थ्वपाखें बचे जुइगु थाय् मदुगु खँ निगम सूत्रं धाःगु दु।