राजधानी प्रदेशया खँ वयाच्वंगु मदु : प्रचण्ड
येँ (सन्ध्या टाइम्स)/न्हूगु संविधानय् प्रस्तावित नेवाः स्वायत्त प्रदेशयात राजधानी प्रदेशया रुपय् हिलाः नेवाःतय्त हक अधिकार मबीगु जुल धकाः नेवाःतय् दुने चिउताः जुयाच्वंगु इलय् एकीकृत माओवादीया अध्यक्ष प्रचण्डं आः तक छुं नं राजनीतिक दलं स्वनिगःयात राजधानी प्रदेश दयेकेगु धकाः आधिकारिक रुपं प्रस्ताव हयाच्वंगु मदु धयादीगु दु ।
थौं सुथय् नेवाः स्वायत्त राज्य मंकाः संघर्ष समितिया नेतृत्व प्रचण्ड निवास नयाँबजारय् डेलिगेशन वंगु इलय् वय्कलं सुनां नं राजधानी प्रदेशया प्रस्ताव हल धाःसा थःपिंसं उकियात स्वीकार यायेगु जुइ मखु धकाः नं धयादिल ।
अध्यक्ष प्रचण्डयात ज्ञापनपत्र लःल्हायेगु झ्वलय् नेवाः न्ह्यलुवातय्सं राजधानी प्रदेश धकाः पिने खँ वयाच्वंगु धइगु नेवाःतय्गु अपमानया खँ खः धकाः नं न्ह्यथंगु खः। उगु इलय् प्रचण्डं माओवादीं उत्पीडनय् लानाच्वंगु जाति, समुदाययात मुक्त यायेगु नितिं हे जनयुद्ध याःगु खः धासें गुगुं नं हालतय् राज्य पुनर्संरचनाया आधार उत्पीडनयात त्वःतेगु जुइ मखु धयादिल। वय्कलं प्रदेशया ल्याः, सिमाङ्कन थेंज्याःगु प्राविधिक खँय् जक लचक जुइगु तर सिद्धान्तया खँय् अडान कयाः हे वनेगु जुइ धकाः नं धयादिल ।
मंकाः संघर्ष समितिं याकनं हे नेपाली कांग्रेसया सभापति सुशील कोइराला, एमालेया अध्यक्ष नापं प्रधानमन्त्री झलनाथ खनालयात नं नापलायेगु ग्वसाः ग्वयातःगु दु ।
