माओवादी दुने ब्वलंगु स्वंगू धारया गुट

सेना समायोजनया खँ पिहां वयेवं माओवादी दुने विकसित जुया वःगु स्वंगू गुटया प्रस्ट धारं पार्टीयात 'मझधार'य् लाका बीगु खतरा पिहां वःगु दु। माओवादी दुने छुं ई न्ह्यवंनिसें खने दया वःगु अध्यक्ष प्रचण्ड लिसें उपाध्यक्षपिं मोहन वैद्य व डा. बाबुराम भट्टराईया मतभेदं आः बांलाक हे गुटया रुप काः वंगुलिं आः पार्टी न्ह्याकेत हे थाकुइगु अवस्था पिहां वःगु दु। गुलिसिनं थ्वहे कचवंया दथुइ माओवादी विघटन हे जू वनीगु खः ला धइगु आशंका नं प्वंका हःगु दुसा गुलिसिनं चाहिं माओवादीया थ्व कचवं आन्तरिक खःसां थुकिं निर्माण जुयाच्वंगु देय्या न्हूगु संविधान व शान्ति प्रक्रियायात धाःसा बांमलाःगु लिच्वः लाकी धइगु चिन्ता नं प्वंका हःगु दु। नेपाः थौं थज्याःगु मोडय् वयाः थानाच्वंगु दु कि थ्व इलय् माओवादी पार्टीयात नुगलंनिसें हे घृणा याइपिंसं तकं थ्व पार्टी विभाजन मजूसा जिउ धकाः प्रार्थना यायेमाःगु अवस्था दु ।

भूमिगत राजनीति त्याग यानाः खुल्ला राजनीतिइ वयेवं हे थ्व पार्टी दुने पिहां वःगु कचवं छगू कथं स्वाभाविक नं खः। छाय्धाःसां खुल्ला राजनीतिइ यायेमाःगु ज्या व म्हितेमाःगु भूमिका बारे माओवादी नेतात अनुभवहिन तिनि। तर भूमिकाय् वःगु हिउपाःया कारणं ब्वलंगु थ्व कचवंयात इलय् हे व्यवस्थपन याये मफुत धाःसा उकिं पार्टीयात पाताल प्रवेश याकीगु खँय् नं नेतात सतर्क जुइमाः। आः तक नं ल्वाभः ज्वनाच्वंगु छगू पार्टी वाद वा सिद्धान्तया नामं विभाजन जूवन धाःसा उकिया लिच्वः भयानक जुइगु खँयात माओवादी जक मखु मेमेगु शान्तिप्रिय पार्टीतय्सं नं थुइकेमाःगु आवश्यकता दु। थ्व अवस्था न्ह्याथे यानाः नं मवयेकेमाः ।

More Stories Like this