सिद्धिनरसिंह मल्लं चिनाःतःगु म्येया सम्मेलन

नेवाःतय् संस्कृतिइ झिंनिगू पुन्हि मध्ये ज्यापुन्हि छगू नं खः । थ्व झाः छाक्क निभाः त्वयाः च्वनीगुजुया लकस तसकं म्हाइपुसे च्वनी । सिथिनखः क्वचाया सिनाज्या नं न्हृयाये धुंकीगुलिं इलय् ब्यलय् वा नं वइ । स्वये हे मफय्क निभाः त्वयाः च्वनीगुलिं मनूतय् म्हाइपुया वाःकाः वइ । च्वाच्वं थें च्वने मछू थें जुइ, ज्या याना च्वंपिनि नं म्हाइपुया हसंमसं धयाच्वनी । अन्तर्राष्ट्रिय मान्यता कथं दकसिबय् ताःहाकःगु न्हि २२ जूनयात धायेगु याःसां नेवाःतय्गु संस्कृति कथं दकसिबय् ताःहाकःगु न्हि ज्यापुन्हियात कयातःगु दु । थ्व न्हि खुन्हु न्हिछि ज्यायानाः नं सिमधःम्हेसिया न्हृयाक्व ज्या याःसां सुख सी मखु धकाः धायेगु लोकधापू दु । उकिं थुखुन्हु न्हिखाक -न्हि पूवंक) ज्या याये मज्यू धायेगु चलन थौंकन्हय् ल्यासेल्याय्म्हतय्सं मयाःसां पुलांपिंसं धाःसा धायेगु याःनि ।

थ्व न्हि तसकं ताःहाकःगु म्हाइपुसे च्वंगु न्हि जुयाः यलय् लाय्कू न्हृयःने कातिइ दबुलिइ नेवाः जुजु सिद्धिनरसिंह मल्लं चिनाःतःगु स्वीनिपु म्ये हालेगु संगीत सम्मेलन जुइ । थ्व सम्मेलनय् मेघ मल्हार राग नं हालेमाःगु जुया थ्व हालीबलय् वा नं वइ धाइ । न्हापा जुजु, लानि व लाय्कूया जःपिं लाय्कूया झ्याः झ्यालय् च्वनाः थ्व सम्मेलनयया आनन्द काइ, जनतात दबू न्हयःने च्वनाः म्ये न्यनाः म्हाइपु छ्याइ । थ्व म्येया सम्मेलन आः नं कायम जुयाच्वंगु दु । -ज्यापुन्हि खुन्हु पन्तिइ जात्रा नं जुइ ।)
लुँसियाः तःगु सिंहासन

नेवाःतय् संस्कृतिकथं दकसिबय् ताःहाकःगु न्हि थौं ज्यापुन्हियात धया वयाच्वंगु दु । थुबलय् यलय् लाय्कुलिइ च्वंगु कातिइ दबुलिइ जुजु सिद्धिनरसिंह मल्लं चिनाःतःगु स्वीनिपु म्ये हालेगु महोत्सव जुइ ।
थ्वखुन्हु दबू खवय् च्वंगु कृष्णदेगःया फलय् उकुबहालय् च्वंम्ह श्री जोधाजु शाक्यं ने.सं. ७८७ स नेवाः जुजुयात दानयाना तःगु लुं सिया तःगु सिंहासन ब्वयेगु चलन आः तक नं कायम हे जुयाच्वंगु दु । किपाः वहे ब्वयातःगु सिंहासनयाःगु खः ।