लाक्वपाक्व धेबा मबीत अख्तियारया उजं

येँ (झीगु स्वनिगः)

अख्तियार दुरुपयोग अनुसन्धान आयोगं बजेटय् व्यवस्था मजूगु आयोजना सञ्चालन मयायेत सरकारयात उजं ब्यूगु दु । सरकारं मनोमानी ढंगं रकम वितरण याःगु उजुरी लायेवं अख्तियारं राष्ट्रिय योजना आयोगपाखें स्वीकृत मजूगु व बजेटय् मलाःगु आयोजनाय् रकम खर्च मयायेत प्रधानमन्त्री, मुख्य छ्याञ्जे व थीथी मन्त्रालययात पौ छ्वयेगु ज्या जूगु खः । अख्तियारं प्राविधिक रुपय् लगत अनुमान मजूगु व बोलपत्रया प्रक्रिया मछ्यसे थः यत्थें तर्जुमा यानातःगु योजना आर्थिक दाया अन्त्यय् सञ्चालन मयायेत नापं धाःगु दु । पतिइ आर्थिक दाया अन्त्यय् ज्या न्ह्याकाः दीर्घकालिन रुपय् सरकारयात आर्थिक भार लाइगु आयोजना नापं सञ्चालन यायेमज्यूगु धयातःगु दु । थ्व स्वयाः न्ह्यः, सरकारं मनोमानी ढंगं बजेट वितरण याःगु दाबी लिसे उकियात पनेत माग यासें प्रतिपक्षी नेपाली कांग्रेसं अख्तियारय् उजुरी नापं ब्यूगु खः ।

More Stories Like this