महासंघ साधारण सभाय् वृद्धपाखें उलेज्या

चितवन (झीगु स्वनिगः)

व्यवसायीतय्गु छाता संस्था नेपाल उद्योग वाणिज्य महासंघया विशेष साधारण सभाया मंगलवाः उलेज्या याःगु दु । नाराणगढस्थित होटल सेन्ट्रल पान्सय् सुथय् झिताः इलय् स्थानीय बयोवृद्ध सच्छि व निदा दुम्ह पर्यटन व्यवसायी मल्लु महतों साधारणसभाया उलेज्या यानादीगु खः । प्रधानमन्त्री झलनाथ खनालं उलेज्या यायेगु धयातःसां नं लिपांगु इलय् वयाः वये मलाइगु बुखा छ्वयाः हयेवं वृद्ध व्यवसायीया ल्हातं उगु महोत्सवया उलेज्या यानादीगु महासंघया वरिष्ठ न्वकु भाष्करराज राजकणिर्कारं छगू सञ्चार संस्थायात जानकारी बियादिल । उलेज्यालिपा थीथी प्रस्तावया बारे सहलह यायेगु नितिं बन्द सत्र न्ह्याःगु खः । साधारणसभां व्यवसायीक क्षेत्रया उन्नतीया नितिं वइगु दिंसं अख्तियार यायेगु रणनीति पारित याइगु जानकारी ब्यूगु खः ।

सोमवाः न्ह्याःगु साधारण सभाय् थ्व स्वयाः न्ह्यः नेपाःया भावी अर्थतन्त्र व कृषि क्षेत्रया व्यवसायीकरण लिसे पर्यटन क्षेत्रया सम्भावना बारे अन्तरक्रिया जूगु खः । साधारण सभां महासंघ, जिल्ला उद्योग वाणिज्य संघ व वस्तुगत संघतय्गु भूमिका व हाथ्याया विषयलय् स्पष्ट नीति क्वःछीत राजकणिर्कारं धयादिल । साधारणसभा मंगलवाः हे क्वचाइगु नं महासंघं जानकारी ब्यूगु खः ।

More Stories Like this