पन्ति जात्रा

स्वनिगलं पूर्वपाखे च्वंगु नेवाःतय्गु ऐतिहासिक शहर पन्तिइ दँय्दसं जेष्ठ शुक्ल पूर्णिमाया दिनस पनौति जात्रा अर्थात भद्रकालीया जात्रा जुइगु खः । नेपाःया प्राचीन धार्मिक स्थल कथं म्हसिउगु पन्ति पूण्यमति व रोशी खुसिया दोभानय् लानाच्वंगु दु । थन दुगु इन्द्रेश्वर महादेवया देगः दक्कलय् पुलांगु व महत्वपूर्ण देगः कथं कयातःगु दु । थ्व बाहेक थन थीथी देगः मूर्ति बास्तुकलाया ज्वःमदुगु सम्पदात यक्व हे खंकेफु ।

जेष्ठ शुक्ल पूर्णिमा अर्थात ज्या पुन्हि कुन्हु जुइगु थुगु जात्रा पन्तिया दक्कलय् तःधंगु व महत्वपूर्ण जात्रा कथं कयातःगु दु । थौंया दिनस त्रिवेणीघाटय् म्वःल्हुयाः खः ल्वाकूगु जात्रा स्वःसा दच्छियंकया पाप मुक्त जुइगु विश्वास दु । बर्षामासय् जुइगु थुगु जात्रा नापनापं बुँज्या नं शुरु जुइगु संकेत बी । जात्रा क्वचायेवं बुँज्या शुरु जुइगु खः । विशेष यानाः सिनाज्या शुरु जुइगु खः ।

ज्या पुन्हिया दिंयात दच्छिया दक्कलय् ताःहाकःगु दिं कथं नं कयातःगु दु । अथेजुयाः थौंया दिनस ज्या मयाईपिं व चाय् न्ह्यो मगाःपिंत उमिगु जीवनय् गबलें सुख सीमखु धइगु धापू दु । छाय्धाःसा दक्कलय् ताःहाकःगु दिनस ज्या याये मफूपिं व न्ह्यो मगाःपिं मेगु दिनस गबलें नं सन्तुष्ट जुइ फइमखु ।

ज्या पुन्हिया जात्रा च्यान्हु तक न्ह्याइगु खःसां पुन्हिया दिनस जुइगु जात्रा थःगु हे विशेषता दु । उगु दिनस मौलिक साँस्कृतिक ब्वज्या नापं म्व: म्व: मनूतय्गु उपस्थितिं अनया अनुभूति हे मेगु कथं हे दु । थौंया दिनस सुथंनिसें हे त्रिवेणी घाटय् म्वःल्हुईपिं म्वःम्वः दइ । नापं उगु दिनस देय्या थीथी थासं जात्रा स्वःवइपिं नापं पाहांपिनिगु उपस्थिति यानाः पन्तिया लकस हे तसकं न्ह्यइपुसे च्वनीगु खः । जात्राय् उन्मत्त भैरवया खतं लिउने व इन्द्रेश्वर महाद्यःया खतं न्ह्यःनेपाखे भद्रकाली खःलिसे ल्वाकेगु परम्परागत प्रकृया तसकं स्वयेबहःजू । जात्राया मू आकर्षण नं थ्वहे धाःसां जिउ । परम्परागत बाजंया नापनापं खःयात पन्ति देय्या थी थी त्वाः व चुकय् चाःहिकाः लाय्कुली हयाः खः ल्वाकीगु खः । देय्या दथुइ लानाच्वंगु लाय्कू चकंगुलिं जात्रा तातापाकं नं न्ह्यइपुक हे खनेदु ।

लाय्कुली खः स्वक्वःतक ल्वाकाः अबीर ह्वले न्ह्यः महाद्यः भद्रकाली व भैरवया खःयात पन्ति देय्या हरेक छेँखापतिकं तःधंगु वा चीधंगु वा गच्छेकथं बाहां बीगु चलन दु । जात्राया झ्वलय् रोशी खुसिया सिथं चाःहिकाः सोह्रखुट्टे फल्चा जुयाः लाय्कुली हइगु खः । खःया जात्रा याइगु इलय् महाद्यःया खतय् च्वंम्ह पुजारीं कान्ता डबडब थाइगु खः । खः स्वखः नं लाय्कुली थ्यनेधुंकाः न्हापां भद्रकाली व भैरवया खः स्वक्वःतक व महाद्यः व भद्रकालीया खः प्यक्वःतक ल्वाकीगु चलन दु । थथे खः ल्वाकीगु इलय् रथय् च्वनाच्वंपिन्सं मदिक्क अबिर ह्वलाच्वनी । वहे इलय् बाजं नं ततसलं थाइगु जूगुलिं अनया रौनक हे मेगु हे जुइ ।

मल्लकालय् प्रचलनय् वःगु थुगु जात्राया भगवान शिव व योगिनीया खः जात्रा कथं कायेगु याः । थुगु जात्राया नापनापं छगू धापूयात आः तक विश्वास यानाच्वंगु दु । धापूकथं सत्ययुगय् महाद्यःयात ख्वीप्यम्ह योगिनीतयसं पिछा याःगु इलय् बिसिउँ वनेगु झ्वलय् पन्तिया त्रिवेणीघाटय् तिन्हुया वंगु व अन नं योगिनीतय्सं पिछा यानाच्वंगुलिं महाद्यवं उन्मत्त भैरवया रुप धारण याःगु खः ।

पुन्हिया दिं बाहेक त्रयोदशी व चतुर्दशीया दिनस नं जुइगु थुगु जात्राया झ्वलय् 'दुइँचा ङेकेगु' ज्या नं जुइ । थ्वहे खँय् छगू पुलांगु धापु दु पुण्यमति खुसिया पारीच्वंगु ब्रम्हायणी द्यःयात तान्त्रिक विधिकथं पूजा यायेत वंगु इलय् ताँ त्वःधुल । तुरुन्त हे बासुकि नाग थः हे ताँ जुयाः जात्राय् वंपिं सकसितं उद्दार यायेगु ज्या जुल । थुकथं नागया चुलुगु म्ह ताँ कथं छ्यःगुलिं आःतक नं थुगु जात्राया इलय् वहे ताँ जुयाः ज्यापु पुजारी मू पुजारी व कर्माचार्यत तसकं होसयानाः बुलुहुँ न्यासि वनेगु चलन दु । पुजारीतय्सं ब्रम्हायणी देगलय् मेय् दुगुचा आदि बली बीगु नियम दु । अनिलं तान्त्रिक पूजा यानाः होमय् दुगुचाया छयं बीगु चलन दु । जात्राया झ्वलय् उन्मत्तभैरव देगःया गोप्य क्वथापाखें द्यः हयाः सर्वसाधारणतय्गु दर्शनया लागि पिने ब्वये हइगु खः ।

थुगु जात्राया झ्वलय् स्थानीय द्योलाय्सं नाग व नागिनीया प्रतीक कथं निगः पं लँया सिथय् ब्रम्हायणीया द्यःछेँ निसें पुण्यमाता खुसितक तयेगु चलन दु । थ्वहे पँथय् न्हुयाः पूजा यायेत पारी वनेगु प्रचलन आःतक नं ल्यंदनि । जात्राया च्यान्हुया दिनस चिरनबली व धिमय् बाजं थानाः फुक्क द्यःत देगलय् यंकाः पुनः प्रतिष्ठान याइगु खः । थुकथं थुगु जात्रा छखे साँस्कृतिक महत्व दुसा मेखे सामाजिक सहभागिता व बर्षाया संकेत नं यानाच्वंगु दु ।
वास्तवय् झीगु हरेक जात्रा पर्व परम्पराय् जक सीमित जुइगु मखुकि झीगु जीवन ई व प्रकृति लिसे उलि हे स्वापू दयाच्वनी अले लिक्क तयातइगु खः ।

News Location:

Related Stories

पन्ति जात्राया छुं खँ
नकतिनि क्वचाःगु पनौति मेला
गुम्हेस्यां उगु प्रतिवेदन च्वयादिल

More Stories Like this

मेरिल्याण्डय् लाखय् व पुलुकिसिलिसे हन येँयाः
स्यस्यः समाजं सत्यमोहन जोशीयात हन
मूलयात ग्वाहालि लःल्हात
मेहेन्दी च्वयेगु कासा जुइगु
मचातयत मां भाय् स्यनेगु संस्था नीस्वन