मां माला च्वना

बुद्ब साय्मि

मचा बुइकिगु स्त्री जातिया स्वधर्म खः
अय् ! धरतिया बोझ मस्यूपिं
थःगु स्वार्थय् जक दुपिं
घमण्ड याये माःगु छुं मदु ।

हरेक मुलय् छगः तुं दु
गाः वंलिसे संकीर्ण जुयाः
थःगु थःके सुचुकाः

मेगु किपा जक ब्वैच्वनी
तुंया प्वाः हे छम्ह मांया नुगः खः ।
मखुसा थन चिरिमां शब्द हे बुल छाय् ?
छम्ह मचाया मां मेम्ह मचाया चिरिमां हे जुल छाय् ?

मिखां खनी मिखाया लिसः
नुगलय् थ्वै नुगःया सः
व हे स्वार्थ जाःगु दुरु खः
हिया व हे संकीर्ण चाकः खः
सुनां थन कोतपर्व न्ह्याकी
सुनां थन विश्वयुद्ब याकी ।

भूगोग पार्कया न्ह्योने मां धैपिं लुत्तु लुया हःगु दु
अले सपूत धाःपिं सालिक जुगू
मिखा दक्को हथं जूगु
जिं गथे लोमंके ?
जिं गथे लोमंके व दुरुया कसर !
थ्व स्वार्थया असर ?
अले जिं गथे धाये
जिमि मामं जितः ब्वलंकल ?
वं ला वैगु ला हि जक ब्वलंकल ।

सुनां थन खंक्व मस्त घय्पुना कायेफु
थःगु नुगःपाया दुरु त्वंकाः थः याना कायेफु
जिं थौं माःजुयाच्वना छम्ह मां
मां धैपिनिगु पुचलय् माः जुया च्वना छम्ह मां ।

More Stories Like this