न्याम्हेसिया कार्यदल दयेकल
विवादित विषयय् न्हय्न्हुया दुने सहमति ब्वलंकीगु
येँ (सन्ध्या टाइम्स)/न्हूगु संविधान निर्माणया झ्वलय् पिहां वयाच्वंगु विवादत ज्यंकेगु निंतिं संविधानसभाया संवैधानिक समिति अन्तर्गत गठन याःगु उपसमितिया थौं सुथय् च्वंगु बैठकं विवादित विषय बारे निर्णय यायेत न्याम्हेसिया कार्यदल दयेकूगु दु ।
संविधानया ज्ञाता सभासद्त तयाः दयेकूगु उगु कार्यदलं न्हय्न्हुया दुने हे विवाद समाधानया नितिं छु छु याये फइगु अवस्था दु धकाः लँपु क्यनेगु भाला बिउगु बिउगु दु। उगु कार्यदलय् एकीकृत माओवादी, नेपाली कांग्रेस व मधेसी मोर्चापाखें छम्ह/छम्ह अले एमालेपाखें छम्ह मिसा व छम्ह मिजं यानाः न्याम्ह दुजः दयेकूगु दु ।
उगु कार्यदलय् एकीकृत माओवादीपाखें खिमलाल देवकोटा, नेपाली कांग्रेसपाखें राधेश्याम अधिकारी, एमालेपाखें अग्नी खरेल, मिसापाखें एमालेया हे सपना प्रधान मल्ल व मधेसी मोर्चापाखें लक्ष्मणलाल कर्णयात तःगु दु। वय्कःपिं सकलें हे संविधानसभाया सभासद् नापं कानूनया ज्ञातात खः धकाः दलया नेतातय्सं दावी याःगु दु ।
थौं सुथय् च्वंगु उप समितिया बैठकं राजनीतिक सहमतिया आधारय् हे विवादत समाधान यायेगु धकाः तकं सहमति ब्वलंकूगु खः। अथे हे राज्य पुनर्संरचनाया सम्बन्धय् विवाद जुयाच्वंगु ७८ बुँदायात २६ बुँदाय् हये फइगु अवस्था दु धासें सचिवालयं तयार याःगु प्रतिवेदनयात उपसमितिपाखें कार्यदलयात लःल्हाःगु खः।
उगु विवादयात गुकथं समाधान यायेफइ धकाः नं उगु हे कार्यदलं निर्णय यायेगु थौंया उपसमितिया बैठकं निर्णय याःगु दु ।
विवाद समाधानया निंतिं दयेकातःगु उपसमितिया संयोजक नापं एकीकृत माओवादीया अध्यक्ष प्रचण्ड म्हं मफयाः उपसमितिया बैठक तःन्हु न्ह्यवंनिसें च्वने मफयाच्वंगु खः ।
