'सहमतिया नामय् आदिवासी मुद्दा त्वःते मखु'

येँ (सन्ध्या टाइम्स)/एकीकृत माओवादी अध्यक्ष प्रचण्डं गुगुं नं हालतय् सहमतिया नामय् आदिवासी जनजातिया मुद्दायात थम्हं त्वःतेगु जुइ मखु धयादीगु दु ।

थौं सुथय् प्रचण्ड निवास नयाँ बजारय् वनाः आदिवासी जनजाति संयुक्त संघर्ष समितिपाखें ज्ञापन पौ लःल्हाःगु इलय् वय्कलं अथे धयादीगु खः। संघर्ष समितिं लःल्हाःगु १६ बुँदाया ज्ञापन पौ लःल्हाना कासें प्रचण्डं थःपिं जनजातिया माग प्रति सकारात्मक दु, उकिं आदिवासी जनजातिया माग जातीय पहिचानया आधारय् स्वायत्तता, आत्मनिर्णयया अधिकार व अग्राधिकारयात सहमतिया नामय् थःपिंसं गुगुं हालतय् नं त्वःते मखु धकाः बचं बियादीगु खः ।

आदिवासी जनजातिया माग पूरा यायेमाःगु नाप नापं राज्य पुनर्संरचनाया आयोग दयेकेगु व स्वनिगःयात राजधानी प्रदेश याइगु जुल धकाः वयाच्वंगु खँप्रति थःपिनिगु असहमति दु धकाः ज्ञापन पती न्ह्यथना तःगु दु ।

अथे हे छुं दिं न्ह्यः जक संघर्ष समितिं नेपाली कांग्रेसया सभापति सुशील कोइरालायात ज्ञापन पौ लःल्हाःगु खः ।

कन्हय् प्रचण्डयाथाय् नेवाःतय्गु डेलिगेशन
नेवाः स्वायत्त राज्यया निंतिं आन्दोलन याना वयाच्वंगु नेवाः स्वायत्त राज्य मंकाः संघर्ष समितिया ग्वसालय् कन्हय् नेवाःतय् छगू डेलिगेशन वनाः माओवादी अध्यक्ष प्रचण्डयात नापलाइगु जूगु दु ।

नेवाः स्वायत्त राज्य सुनिश्चित यायेमाःगु नापं आदिवासी जनजातिया हक अधिकारयात न्हूगु संविधानय् ग्यारेन्टी यायेमाःगु व आः चर्चाय् वयाच्वंगु येँदेय्यात राजधानी प्रदेश दयेकेगु खँ चीके माःगु माग यासें नेवाःतय् पाखें ज्ञापन पौ लःल्हायेत उगु डेलिगेशन वनेत्यंगु खः ।

पहिचानयात त्वःतेगु जुइ मखु: प्रम खनाल
आदिवासी जनजाति संयुक्त संघर्ष समितिं म्हिगः प्रधानमन्त्री झलनाथ खनालयात ज्ञापन पौ लःल्हाःगु इलय् वय्कलं प्रदेश व प्रदेशया नां उखे थुखे जूसां पहिचान व सामर्थ्यताया आधारय् प्रदेश दयेकेगु सवालयात धाःसा त्वःतेगु जुइ मखु धयादीगु दु। सिंहदरवारय् प्रम खनालयात ज्ञापन पौ लःल्हाःगु इलय् जनजातिया नेतातय्सं राजधानी प्रदेशयात थःपिंसं स्वीकार यायेगु जुइ मखु धयादीगु खःसा उगु इलय् वय्कलं अःखतं 'थन राजधानी प्रदेश मतःसा छु यायेगु' धकाः न्ह्यसः तकं तयादीगु खः ।