आन्दोलनया ख्याच्वः त्वःतेत कांग्रेसयात इनाप
येँ (सन्ध्या टाइम्स)/वर्तमान सरकारया नेतृत्व यानाच्वंगु एमालें प्रमुख प्रतिपक्षी दल नेपाली कांग्रेसयात आन्दोलनया ख्याच्वः त्वःताः न्हूगु संविधान निर्माणया निंतिं सहमतिइ वयेत इनाप याःगु दु ।
थौं सुथय् सिंहदरवारय् एमाले संसदीय दलया ज्याकुथी च्वंगु एमाले संसदीय दलया बैठकं कांग्रेसयात थ्व इनाप याःगु खः। बैठक लिपा एमालेया मुख्य सचेतक भिमप्रसाद आचार्यं धयादिल, 'आन्दोलनं जक समस्या समाधान जुइ मखु। कांग्रेसं आन्दोलनया ख्याच्वः बीगु थासय् सहमतिइ वयाः संविधान निर्माणय् ग्वाहालि यायेमाः धकाः जिमिसं इनाप यानाच्वना ।'
एमाले संसदीय दलया उगु बैठकय् संसदीय दलया विधान संशोधन यायेगु बारेया प्रस्ताव नं पेश जूगु खः ।
कांग्रेसया निन्हु तक जुयाः वंगु आइतवाः जक काभ्रेया धौख्यलय् क्वचाःगु जिल्ला सभापतितय्गु भेलां माओवादी व एमाले शान्ति प्रक्रिया व संविधान निर्माणया नितिं गम्भीर मजूगु द्वपं बिसें भदौ १४ लिपा आन्दोलन यायेगु नितिं भदौया न्हापांगु वालय् हे पार्टीया महसमितिया दुजःतय्गु भेला सःतेगु धकाः निर्णय यायेधुंकूगु दु। महासमितिं आन्दोलनय् वनेगु निर्णय यायेफु धाःगु दु ।
