नेवाः म्युजियम धस्वाकेगु पहल

नेवाःतय् आदिभूमि नेपालमण्डलय् नेवाः म्युजियम पलिस्था यायेगु बारे छगू प्रस्ताव न्ह्यःने वःगु समाचार पिहां वःगु दु। येँया हनुमानध्वाखा लागा नेपाःया हे दकलय् बांलाःगु सम्पदास्थल खः। तर अन च्वंगु जिल्ला प्रहरी ज्याकुथिं यानाः हनुमानध्वाखाया सम्पदास्थल प्रदुषित जुयाच्वंगु दु। उकिं उगु ज्याकूयात अनं चीका छ्वयेगु बारे छुं ई न्ह्यवंनिसें कुतः जुयाच्वंगु खः। तर नेवाः लागा व सम्पदा धइगु मसिउपिं राजनीतिक नेतृत्वं यानाः उगु ज्याकूयात अनं चीकेगु कुतः ताःलाये फयाच्वंगु मदु। आः वयाः उगु प्रहरीयात ज्याकूयात अनं चीकाः अन नेवाः म्युजियम पलिस्था यायेगु प्रस्ताव न्ह्यःने वःगु दु। थ्व तसकं बांलाःगु व उपयुक्त प्रस्ताव खः ।

हनुमानध्वाखा लागा नेवाःतय् पुस्तां हे दयेकातःगु खः। राज्यसत्ताय् नेवाःतय् बांलाःगु पहुँच दुगु ईया थ्व लाय्कू नं जूगु कारणं थ्व थाय्यात नेवाःतय् केन्द्र हे धाःसां जिउ। उकिं नेवाः सम्बन्धी म्युजियम गनं नं चायेकेगु खःसा व हनुमानध्वाखा लागा ति उपयुक्त थाय् मेगु मदयेफु। म्युजियम निर्माण समितिं अतिकं पाय्छिगु थाय् ल्यःगु दु। हनुमानध्वाखाया उगु भिडभाडपूर्ण सम्पदा लागा प्रहरी ज्याकू च्वनेत छुं नं कथं लायक मजू। उकिं उकियात अनं पित यंके हे माः ।

नेवाः म्युजियम केवल नेवाःतय्गु जक म्युजियम मखु। नेवाः जाति मुक्कं नेपाःया हे म्हसीका क्वबियाच्वंगु छगू महत्वपूर्ण जाति जूगु कारणं थुमिगु म्हसीका बीगु म्युजियम धइगु नेपाःया धाथेंया म्युजियम जुइगु खँ शंका मदु। उकिं थुकियात धस्वाकेगु ज्याय् नेवाः लगायत मेपिं नं जनसमुदायं हःपाः व तिबः बीमाःगु खनेदु ।

More Stories Like this