ताःतू बैंक

नर्मदेश्वर प्रधान

खँयाखँय्
उबलय्। जिमि मांया अपरेशन। हि माली। माहांकाद्यःया न्ह्यःने रेडक्रस अफिस। रेडक्रस अफिसया पिने भरियात ग्वाग्वाः। हि मीपिं। इमिके हि न्यायेगु। हिया परिक्षण रेडक्रस अफिसं याइ। छगू बोटल हिया सछि। उबलय् हि न्यानागु लुमं। कुसिं हि छफुति त्वनीबलय् हि पाः जुइ धकाः चिन्ता काइपिं दु। थुज्वःपिं हि बीत ग्याइ। तयार जुइ मखु। भरियात अथे मखु। हि मी। ध्यबा काइ। उबलय् सछि धइगु नं आपाः। खर्चबर्च तरे याइ। गुलिस्यां हि मीगु लजगाः हे जुइ। थौंकन्हय् हि बैंकया व्यवस्था दु। इलय्ब्यलय् रक्तदानया कार्यक्रम जुइ। अपरेशन याये माली। हि चूलाके माली। ब्लड बैंकय् हि न्याये दु। रेडक्रसं हिया संस्थागत व्यवस्था याइ। हि दान हानिकारक मखु। जागरण वइ। बैंकया अर्थ वित्तीय संस्था खः। ध्यबा तयेगु। माल कि ध्यबा त्याय् कायेगु थाय्। सामान्यतया थुकथं हे थुइकेगु जुइ। तर थौंकन्हय् बैंकत अनेक अर्थय् खने दइ। अनेक रुप ज्वनाः वइ ब्लड बैंक। थ्व ध्यबाया बैंक मखु। थन हिया कारोबार जुइ। अथे हे मिखा बैंक दु। व नं ध्यबालिसे स्वापू दुगु बैंक मखु। मनू सी। सीधुंकाः मिखा दान यायेफु। मिखां मखंपिंत मिखा दानं कल्याण याइ। मिखा बैंकं मिखा दान बिउपिनि मिखा संकलन याइ। मांपिंत बी। मेगु कथंया बैंक। शुक्रकीटया बैंक। थ्व नं बिस्कंगु बैंक जुइ। ध्यबाया कारोबारलिसे स्वापू मदुगु। शुक्रकीट बैंकय् शुक्रकीटया कारोबार जुइ। शुक्रकीटया समस्या जूपिंत शुक्रकीट बैंकं शुक्रकीट चूलाका बी। थुकथं थौं थीथी प्रकारया बैंक खने दइ। भविष्यय् छु छु कथंया बैंक लुइगु खः, वइगु खः ! छुं ई न्ह्यः। तःधंगु राजनीतिक पार्टीया महाधिवेशन जुइ। द्वलंद्वः मनूत मुनी। प्यन्हु न्यान्हु भव्य कार्यक्रम जुइ। लिपा अखबारय् ब्वने। उगु महाधिवेशनय् द्वलंद्वः लिटर च्व संकलन जुल। द्वलंद्वः जर्किन जाइ। व्यवस्थित याइ। कृषिइ च्वया तःधंगु महत्व दइ। ग्वसाः खलकं थुइकी। संकलन याइ। छफुति हे उखेथुखे याइ मखु। सुचं बी। प्रचार याइ। च्व न्यायेमाःपिंस स्वापू तःसां जिउ। अखबारय् विज्ञापन बी। प्रचार प्रसार याइ। च्व त्यासा कथं नं बीफु। ब्याज च्व हे काइ। च्वया कारोबार यायेत आह्वान याइ। तःधंगु राजनीतिक पार्टी। तःधंगु महाधिवेशन। अन राजनैतिक उपलब्धि छु जुल? जिं मसिउ। जि राजनैतिक विश्लेषक मखु। राजनैतिकया गणित जिं मथू। तर च्वया संकलन, त्यासा व्यवस्था, उगु अधिवेशनया तःधंगु उपलब्धी खने दइ। आशा काये, लिपा लिपा राजनैतिक पार्टीतसें ग्वसाः ग्वइगु महाधिवेशनय् राजनैतिक उपलब्धी छुं हे मजूसां च्व संकलनया व्यवस्थापन बांलाक जुइमाः। खः, राजनैतिक निकासलिसे च्व संकलनया छुं मतलब मदु। तर च्व संकलनया खँय् राजनीतिक कार्यक्रमया भूमिका दइ। थ्व खँय् जागरण चकना वंसा च्व बैंकया स्थापना याकनं हे जुइ फइ। आशा यायेफु ।

मिखाया कारोवार। थ्वं व्यापारिक रुप मकाःनि। मिखा दानया खँ जुइ। तर मिखा न्यायेगु मीगु चलन मजूनि। मनूतसें मिखा दान याये थाकु चाइ। थुगु जन्मय् मिखा दान बी। मेगु जन्मय् कां जुयाः जन्म जुइ। ग्याइपिं दु। मिखा दानया महिमा छु? प्रचारप्रसार जुइ। मनूतसें थुथुं वइ। नकतिनि छगू बुखँ ब्वने। छम्ह मय्जुया इहिपा भ्वय्। भ्वय् वःपिंसं मय्जुयात दां क्वसः बी मखु। मिखा दान यायेगु बचंया क्वसः बी। थ्व न्हूगु कथंया क्वसः जुइ।
बजारय् किडनी कारोबारया खँ व। किडनी दानया चलन मदु। कलाःभाःत, मचाखाचायात किडनी दान बिउपिं दइ। तर सार्वजनिक रुपय् किडनी दान याःगु खने मदु। किडनीया अवैध व्यापारया खँ गाक्कं न्यने दइ। गरिब मनूतसें किडनी मी। आर्थिक समस्या तरे याइ। थज्याःगु खँ न्यने दइ। किडनी मी। रिक्सा न्याइ। ल्हाःतुति चूलाकेगु लजगाः दयेकी। थज्याःगु घटना नं न्यने खं। अत्यावश्यक वस्तुपूत जक थौंकन्हय् मनूत गन सन्तोष जुइ ! प्यखेरं विलाशिलाताया साधन खनी। मनूत आकर्षित जुइ। मनूतय् इच्छा आकांक्षायात कुला बी। मन ची फइ मखु। आम्दानीं भाय् ल्हाइ मखु। आवश्यक वस्तु मखय्फु। आकर्षित वस्तुत चूलाकेमास्ति वइ। गय् यानाः चूलाकेगु? लँपु लुइकेत स्वइ। छम्ह युवकं आइपड न्यायेमास्ति वयेकी। वयाके ध्यबा दइ मखु। वं थःगु किडनी मी। आइपड न्याइ। पत्रिकाय् ब्वने। थौंया ल्याय्म्ह ल्यासेत। झःझ धाःगु जीवन इमि आज्जु जुइ। विलासी जीवन हनेमास्ति वइ। ध्यबा दइ मखु। किडनी मियाः मनूतसें वसः तिसा न्याःगु बुखँ नं ब्वने माली तिनि जुइ ।

किडनीया चोरी, डकैती नं जू। डाक्टरतसें प्वाःया अपरेशन याइ। मसीक किडनी लिकया बी। जबरजस्ती यंकाः किडनी लिकया बिउगु घटनात नं न्यनेदु। मिखा दानया खँ जुइ। किडनी व्यापारया खँ वइ। किडनी चोरी डकैतीया हल्ला जुइ। मनूतय्त ध्यबा माः। थौंकन्हय्या संसार ध्यबां हे चले जुइ। मिखा दान कन्हय् व्यापारय् परिणत मजुइ धाये फइ मखु। सी उइ न्ह्यः हे मनूया मिखाया लिलाम जुइगु न्हि नं वइ ।

चीनय् १० प्रतिशत मनूत नामर्द। इमि वीर्यय् मचा दयेकेगु क्षमता मदु। थ्वहे कारणं अन वीर्यया तसकं हे माग दइ। ध्यबा आखिर जूपिं विद्यार्थीतय्सं वीर्य मी। ध्यबा मुंकी। आम्दानी याइ। आर्थिक संकटं मुक्त जुइ। वीर्य व्यापार विद्यार्थीतय् आर्जनया स्रोत जुया बी। थ्व खँ जिं हालसालय् अखबारय् ब्वनागु खः ।

व्यापारया खँ ल्हाये। जाकि। बजि। केँ। आलु। वसः। तिसा। चलनचल्तीया बाना जुइ। थौंकन्हय् व्यापारया बानाय् हिउपाः वइ। विचित्रगु हिउपाः। मिखाया व्यापार, किडनीया बजार। वीर्यया न्याये मी। थौंकन्हय् गर्भाशयया नं व्यापार जू। मिसातय् मचाछेँ। मचा दयेकेगु क्षमता दइ मखु। थज्याःगु अवस्थाय् मेपिनिगु गर्भाशय बालं कयाः मचा दयेके जिउ। तर थ्व देह व्यापार स्वयां पाइ। देह व्यापारयात बांमलाःगु दृष्टिकोणं स्वइ। गर्भाशय बालगिरी कायेगु ज्या। बांमलाः खने दइ मखु। न्हूगु प्रविधि जुयाः खनेदइ। गर्भाशय बैंकया नं व्यवस्था जुइफु। गभाशय् लोन काये दइगु न्हि नं वइतिनि। शंका मदु ।

स्वन्ति नखःबलय् ताःतूया व्यापार बांलाइ। न्ह्यपु, स्यँ, स्वँ, आन्द्राभ्वरि पुकाः नये। साइ। ताःतूया खूब बिक्री जुइ। विज्ञानया विकासं मनूतय् शरीरया अंग हिले जी। अदल बदल याये जी। थज्याःगु सम्भावनात सत्य जुया वइ। थौं मिखा, किडनी, गर्भाशयया माग जुइ। उकिया बजार दइ। इमि बैंक व्यवस्था यायेमागु खँ वइ। कन्हय् विज्ञानया चमत्कारं सेँ स्वँ नं हिले जी। आन्द्राभ्वरि नं प्रत्यारोपण याये जी। अले बजारय् सेँ, स्वँ, आन्द्राभ्वरिया कालबिल जुइ। व्यापार खने दइ। ताःतू बैंक थाय्थासय् चाली। थ्व कल्पना मखया बी ।

More Stories Like this