घोटाला प्रकरणय् लाःपिं प्रहरी अधिकृतत नापलाये ज्याय्

येँ (झीगु स्वनिगः)

सुडान घोटाला काण्डय् अख्तियार दुरुपयोग अनुसन्धान आयोगं मुद्दा दायर याःपिं प्रहरी अधिकृततय्सं सोमवाः राज्य व्यवस्था समितिया सभापति रामनाथ ढकाललिसे सहलह याःगु दु । समितिया ज्याकू सिंहदरबारय् सोमवाः जूगु सहलहसं अभियुक्ततय्सं थःपिं निर्दोष जूगु दाबी याःगु दु । उमिसं राजनीतिक नेतृत्वयात छु नं मयासे थःपिं विरुद्ध जक विशेष अदालतय् मुद्दा न्ह्याकूगु खाय् च्यूताः प्वंकूगु खः ।
लिसलय् राज्य व्यवस्था समितिया सभापति ढकालं अदालतय् विचाराधीन मुद्दाय् थःम्हं छु नं न्ववाये मफइगु धयादिल । सभापति ढकालं निष्पक्ष छानबिन यानाः दोषीयात कारबाही यायेमाःगुलिइ बहः बियादिल । सुडान काण्डया विषयलय् छानबिन यायेत राज्य व्यवस्था समितिं उपसमिति नीस्वनाः स्थलगत निरिक्षण यायेधुंकाः सुडानया डार्फरय् वंपिं प्रहरीया नितिं बन्दोबस्तीया ज्वलंत न्याःबलय् भ्रष्टाचार जूगु पुष्टी जूगु खः ।