चिलिमे थप आयोजना निर्माणया तयारीइ

रसुवा (झीगु स्वनिगः)

नेपाली शीप व लगानीइ निर्माण जूगु सफल चिलिमे जलविद्युत आयोजनां थप प्यंगू आयोजनात निर्माण याइगु जूगु दु । उकिया नितिं नागरिक लगानी कोषं झिंखुगू अर्ब तका धेबा ऋण स्वरुप लगानी याइगु चिलिमे जलविद्युत आयोजनाया प्रमुख डा. डम्बरबहादुर नेपालीं जानकारी बियादीगु खः । चिलिमे विद्युत कम्पनीं दयेकेत्यंगु उगु प्यंगू आयोजनात साङ्जेन, अपर साङ्जेन, रसुवागढी व मध्य भोटेकोसी खः ।
आयोजनाया नितिं कर्मचारी सञ्चय कोषं झिंखुगू अर्ब न्यागू करोड तका धेबा ऋण लगानी यायेगु निर्णय नापं यायेधुंकूगु दु । दयेकेत्यंगु उगु प्यंगू आयोजनां निसः व ख्वीगू मेगावाट बिजुली उत्पादन याइगु नापं डा. डम्बरबहादुर नेपालीं जानकारी बियादीगु खः ।

चिलिमें दयेकेत्यंगु न्हूगु मध्ये दकले अप्वः क्षमता दुगु आयोजना भोटेकोसी खः । सच्छि व निगू मेगावाट दुगु उगु आयोजना सिन्धुपाल्चोकय् लाःसा सच्छि मेगावाटया रसुवागढी, साढे ४२ मेगावाटया साङ्जेन व झिंप्यंगू दशमलव खुगू मेगावाटया अपर साङ्जेन रसुवाय् हे लाः । थुपिं विद्युत आयोजनात आः याकनं हे ज्या न्ह्याकीगु नं कम्पनीपाखें जानकारी ब्यूगु खः । कम्पनीयाकथं २०१६ सालतक्कयादुने फुक्क आयोजना पूवनीगु धाःगु दु । प्यंगू आयोजनाया नितिं कूल स्वीनिगू अर्ब झिंछगू करोड खर्च जुइगु प्रबन्ध सञ्चालक कुलमान घिसिङं जानकारी बियादिल ।

More Stories Like this