युथफोर्सपाखें प्रहरीयात चुनौति

येँ (झीगु स्वनिगः)

एमालेया युवा संघ नेपालया नायः महेश बस्नेतं विराटनगरया पत्रकार खिमलाल ढकालयात आक्रमण याःगु घटनाय् मू दोषि धकाः द्वपं बियातःम्ह परशुराम बस्नेत थःनापं दु धकाः धयादीगु दु । फौजदारी मुद्धाया आरोपीतयात थःम्हं संरक्षण बियाः तयागु धकाः खुल्ला रुपं धयाः न्वंवानादीम्ह वय्कः न्हापांम्ह मनू खः । अपराधी धयातःम्ह परशुराम बस्नेतयात प्रहरी प्रशासनं मालाच्वंगु अवस्थाय् वय्कलं अथे धयादीगु धैगु छगू कथं प्रहरी प्रशासनयात चुनौति ब्यूगु खः । म्हिगः सोमवाः ख्वपय् जूगु छगू ज्याझ्वलय् बस्नेतं अथे हाथ्या बियादीगु खः ।

वय्कलं संसदीय छानविन समितिं बस्नेतयात दोषी ठहर यात धाःसा तत्काल हे प्रहरीयाथय् वय्कःयात थःम्हं हे यंकाबिइ धकाः तकं नं धयादिल । युवा संघया नायः बस्नेतं धयादिल 'जि युवा संघया जिम्मेवार मनू खः । परशुराम जि नापं दु, संसदीय समितिं राजनीतिक ब्यक्ति मतःसे पुलांम्ह न्यायधीश मानवअधिकारवादी तयाः न्यायिक छानविन आयोग गठन यायेमाल अले उगु आयोगं जिमि कार्यकर्तायात दोषी ठहर यात धाःसा १ घण्टाया दुने हे प्रहरीयात लःल्हानाः बिइगु जुइ ।' परशुराम बस्नेत दोषी मखु धकाः दावी यानादिसें वय्कलं थः कार्यकर्ता बिस्युं वःगु मखुसां चरित्र हत्या यायेगु कुतः यानाच्वन धकाः तकं धयादिल । एमालेया युवा संघया नायः महेश बस्नेतं खुल्ला रुपं हे थः कार्यकर्ता परशुराम बस्नेतयात प्रहरीं ज्वने फुसा ज्वनास्व धबकाः प्रहरी प्रशासनयात तकं हाथ्या बियादिल । नेपाल पत्रकार महासंघं तकं पत्रकार ढकालयात आक्रमण याःगु घटनाया योजनाकार नापं नाइके हे एमालेया युथ फार्स मोरङया नायः परशुरमा बस्नेत खः धकाः ठहर यानाः उकि अभियुक्त बस्नेतयात ज्वनाः कारवाही यायेमाःगु माग यानाः देय्न्यंकं आन्दोल यानाः वयाच्वंगु दु । युवा संघया नायः बस्नेत एमाले दुने वरिष्ठ नेता केपी शर्मा ओली नाप लिक्क लाःम्ह खः ।