सेना समायोजन धुंकाः जक ल्वाभः लःल्हायेगु जुइः माओवादी

येँ (झीगु स्वनिगः)

संविधासभाया दक्ले तःधंगु दल एकीकृत नेकपा -माओवादीं) सेना समायोजन मजुइकं सरकारयात ल्वाभः लःल्हायेगु जुइमखु धकाः स्पष्ट याःगु दु । म्हिगः सोमवाः व्यवस्थपिका संसदया मुँज्याय् न्वंवायेगु झ्वलय् माओवादीया नेता बर्षमान पुन अनन्तं सेना व ल्वाभः ब्यागलं ब्यागलं तयेगु व ल्वाभः बुझेयायेमाःगु माग न्हापाया सहमतिया अःखः खः धकाः तकं धयादिल । माओवादीया नेता अनन्तं धयादिल 'आः सेना व ल्वाभः ब्यागलं ब्यागलं यायेगु, ल्वाभः लःल्हायेगु थें जाःगु खँ न्ह्यथनाच्वंगु दु । थ्व धैगु न्हापाया जूगु सहमतिइ गन नं गुगु थासय् नं सेना व ल्वाभः ब्यागलं यायेगु व ल्वाभः लःल्हायेगु खँ न्ह्यथनातःगु मदु ।' वय्कलं सेना व ल्वाभःयात ब्यागलं यायेगु व ब्यक्ति ब्यक्तिया समायोजन यायेगु प्रस्ताव माओवादीया नितिं मान्य जुइमखु धकाः नं स्पष्ट यानादिल ।

लिपांगु निवाःया दुने शान्ति प्रक्रियाय् उल्लेखिनिय प्रगति जूगु दु धयादिसें माओवादीया नेता अनन्तं थीथी कथंया त्वहः तयाः प्रमुख प्रतिपक्ष दल नेपाली कांग्रेस संविधान निर्माणपाखें बिस्युं वनेत्यंगु आशंका यानादिल । 'छखे शान्ति प्रक्रिया न्ह्यब्वाकेगु अले मेखे आन्दोलनया ख्याच्वः बिइगु, तयारी यायेगु, थ्व छुकिया संकेत खः श्र संविधानया मस्यौदा दयेकेगु खँयात हाकुतिना छ्वयेगु कुतः यानाच्वंगु जकं मखुला धकाः न्ह्यसः ब्वलनीगु स्वाभाविक हे खः ।'माओवादीया नेता अनन्तं राज्यया पुनर्संरचना आयोग गठनया खँ न्ह्यथना कांग्रेसं भदौ १४ गते संविधानया न्हापांगु मस्यौदा हयेके मबिइगु जकं मखुला धकाः गम्भीर रुपं आशंका ब्वलंगु दु धकाः नं न्ह्यथानादिल । वय्कलं संविधान च्वयेगु बारे प्रष्ट कथं लिसः व विश्वसनिय वातावरण दयेकेगु कांग्रेसयात इनाप यानादिसें । वय्कलं लिपांगु इलय् दलतय्गु दथुइ विश्वासया वातावरण दयेकेत व न्यागू बुँदाया सहमतिप्रति पार्टीपाखें प्रतिबद्धता प्वंकेत माओवादी पार्टीं नेतातय्गु दोहोरो सुरक्षा प्रणाली चीकेगु निणर्य यानागु खः धकाः तकं सदनयात जानकारी बियादिल ।