बाल श्रम वन्द या

नेपालं अन्तराष्ट्रिय वालअधिकार महासन्धिइ हस्ताक्षर याःगु तःदँ दये धुंकलसां नेपालय् क्वयया निम्नस्तरया ज्याय् बाल श्रमीकत छ्यलावयाच्वंगु खं उगु हस्ताक्षर यानातःगु महासन्धिया औचित्यतायात सावित मयायेगु ज्या जुयाच्वंगु दु । महासन्धिइ हस्ताक्षर यायेगु तर उगु सन्धि कथंया ज्या मजुइगु धयागु नेपाःया नितिं तसकं मछाले पुस्से च्वंगु खँ खः । न्ह्याम्ह सरकार वःसां बाल श्रमयात पनेगु खँया हल्ला याइ, तर ज्या धाःसा छुं हे जुइमखु । थुकिं अन्तराष्ट्रिय ख्यलय्हे नेपाःया वदनाम जुयाच्वंगु खँय् निगू मत मदु । नेपालय् हाल २१ लाख ४० हजार मचातय्त अतिकं निम्नसार व ग्यानापुगु श्रमयाना च्वंगु खँ छगू तथ्यांकं न्ह्यःने हःगु दु । अथ्यला नेपालय् बालश्रमयात पनेत डर्जनौं एनजिओ, आइएनजिओत सकृय जुयाच्वंगु दु । लिच्वः सन्तोषजनक मजूसां इमिसं थुगु क्षेत्रय् बांलाक ज्या जुयाच्वंगु धाःसां नं सवा लाख बाल श्रमिकत जोखिमपूर्ण ज्याय् सकृय दु ।

नेपालय् ज्या यानाच्वंपिं बाल श्रमिकत मध्ये गुंगू प्रतिशत जक औद्योगिक व औपचारिक क्षेत्रय् लगय् जुयाच्वंगु दुसा ल्यं ४४ प्रतिशत कृषि क्षेत्रय् लगय् जुयाच्वंगु तथ्यांक न्ह्यःने वःगु दु । थ्व वाहेक घरेलु ज्याय्, सतक मस्त, यातायात, गलैंचा कारखाना, जरी व इम्व्राहडरी, छेँ दनेगु थाय्, अप्पा दयेकेगु, फि लिकायेगु, लोहं, कोइला खानी, होटल व मनोरञ्जनया क्षेत्रय् मस्तय्सं ज्या याना वयाच्वंगु खनेदु । थुगु क्षेत्रय् ज्यायाइपिन्त शुरुइ बांलाःगु तलव, सुविधाया लोभ क्यनेगु याःसां ध्यबा मविसे छप्यः नकीगु वाहेक शोषणया मारय् लानाच्वंगु अनुसन्धानं खनेदु । थ्व क्षेत्रय् ज्यायाइपिं मस्तय्त मानसिक, शारीरिक व यौन शोषण नं जुयावःगु दु । शोषणया मारय् लानाच्वंपिं यक्को मस्तय्त शोषणं मुक्त यायेगु बचं व्यूसां एनजिओ आइनजिओतय्सं उज्वःगु वचंन पूवंकूगु खनेमदु । छख्य सरकार उदासिन, मेख्य एनजिओतय्गु व्यवसायिक व्यवहारं शोषणय् लनाच्वंपिं मस्तय्गु उद्धार जुइफयाच्वंगु मदु ।

आखः ब्वनेमाःगु इलय् ज्यायाना नयेमाःगु वाध्यतां बालश्रमिक जूवइपिनिगु वारे सरकारयाके माक्को सूचना मदुसां दुगु सूचनायात नं व्यवहारय् छ्यलेगु यानावयाच्वंगु मदु । छेँय् आर्थिक अवस्था कमजोर जुया शहरय् वयाः ज्या याःवइपिन्त सुनां सुनां आखः ब्व्ंकेवीगु धयाःनं थःगु छेँय् बाल श्रमिकत तयाः ज्याकया वःगु दु । थःपिन्त अतिकं शिक्षित व सम्पन्न धयातःसां बालश्रमयात कयाः थुमिगु विचाः सकारात्मक खनेमदु । कानूनत बाल श्रमिक पाखें मदु धयातःसां व्यवहारय् उकियात सुनांनं लागु यानाच्वंगु अवस्था मदु । सरकार बालश्रमयात निषेध यायेत ऐन २०५६ व २०४८ यात कार्यान्वयनय् हःसां व्यवहारय् लागु यायेफयाच्वंगु मदु । अथ्यखसां नं २०२० तक्कया दुने फुक्ककथंया वालश्रमया अन्त्य यायेगु धाःगु दु । थ्व ज्याय् कानून प्रभावकारी जुइमाःगु व मस्तय्सं वालश्रम यायेमाःगु वाध्यात्मक अवस्थायाहे मदयेकेमाःगु विज्ञपिनिगु धापू दु । पित्या पिन्त आस्वासन मखु, मरिमाः छप्यः नयेगु व्यवस्था माः आखः ब्वने दैगु वातावरण माः ।

More Stories Like this