पत्रकारतय्गु आन्दोलन व युथ फोर्स

येँ (झीगु स्वनिगः)

विराटनगरया पत्रकार खिलानाथ ढकालयात आक्रमण याःगु घटनायात कयाः एमालेया युवा मोर्चा युथ फोर्सया झन झन हे बदनाम जुजुं वनाच्वंगु दु । युथफोर्स मोरङया नायः पर्शुराम बस्नेतया नेतृत्वय् अथे पत्रकारयात आक्रमण याःगु खः धकाः पत्रकारतय्सं धयाः वयाच्वंगु दु । वर्तमान सरकारया नेतृत्व यानाच्वंगु नेकपा -एमाले)यात पत्रकार आक्रमणया घटनां यानाः तसकं समस्या ब्वलनाच्वंगु दु । एमालेया नेतातय्सं प्रत्यक्ष व अप्रत्यक्ष रुपं उगु आक्रमणया घट्नायात कयाः सार्वजनिक रुपं न्वंवाये मालाच्वंगु दु । पत्रकारतय्गु मंकाःगु संगठन नेपाल पत्रकार महासंघया थौंकन्हय् नायः जुयाच्वनादीम्ह पत्रकार शिव गाउँले स्वयं एमालेया कोटां चुनावय् त्याःम्ह खःसा वय्कलं हे उगु आक्रमणया घटनायात कयाः पत्रकारतय्गु आन्दोलनया ज्याझवः तकं घोषणा यानाः सतकय् क्वहां वयाच्वंगु दु ।

विशेष यानाः पत्रकारयात आक्रमण याःम्ह एमालेया युथ फोर्सया जिल्ला अध्यक्षया हे नेतृत्वय् जूगु खः धकाः स्वयं पत्रकार महासंघं घोषणा याये धुंकूगु नापं उम्ह मनूतयात आः तक नं सरकारं ज्वनाः कारवाही याये मफूगु जक मखु स्वयं एमालेया हे नेतातय्सं संरक्षण बियातल धकाः गुगु कथं खँ वयाच्वंगु दु उकिं यानाः नं एमालेयात झन हे तःधंगु समस्या ब्वलंगु दु । पत्रकार महासंघं ला माल धाःसा सशक्त कथं छगू कथं थुगु घटनां यानाः एमालेया युथ फोर्सया बदनाम तकं जुजुं वनाच्वंगु दु । उप प्रधानमन्त्री नापं गृह मन्त्री कृष्ण बहादुर महरां प्रधानमन्त्री झलनाथ खनाललिसे खँल्हानाः अभियुक्त धयातःम्ह एमालेया कार्यकर्ता बस्नेतयात लःल्हायेत इनाप यायेमाःगु अवस्था तक ब्वलंगु अले प्रम खनाल स्वयं न्ह्यागु हे यानाः जूसां ज्वनेमाल धकाः धायेत बाध्य जूगु धैगु एमालेयात तसकं हे ज्यामछिंगु खँ खः । उलि जक मखु स्वयं पत्रकारतसें पार्टीया केन्द्रीय ज्याकुथिइ वयाः ज्ञापन पौ बिइगु अले अपराधीया सवालय् थःपिन्सं नं माःगु कथं ज्वनेत ग्वहालि यायेगु धकाः धायेमाःगु छखे दुसा मेखे थःगु हे पार्टीया बरिष्ठ नेता केपी शर्मा ओलीया ख्वप जिल्लाय् दुगु छेँय् बस्नेत सुलाच्वन धकाः तकं समाचारत वयाच्वंगु दु । थ्व हे दथुइ एमालेया युथ फोर्सया केन्द्रीय नायः महेश बस्नेतं उगु घटनाय् थःपिनि कार्यकर्ता पर्शुराम बस्नेतया ल्हाः मदु धकाः धायेत बाध्य जूगु दु ।

थ्व हे दथुइ उगु घटनायात कयाः संसदया मानवअधिकार तथा अन्तर्राष्ट्रिय सम्वन्ध समितिइ थौं सोमवाः सहलह ब्यकीगु जूगु दु । अथे संसदया समितिइ तकं सहलह जुल धाःसा एमालेयात झन हे ज्यामछिनीगु अवस्थाय् वइ धकाः अःपुक हे धायेफैगु अवस्था दु ।