कांग्रेसपाखें संघर्ष यायेगु ख्याच्वः

कांग्रेसपाखें नेवाः प्रदेशयात अस्वीकार

येँ (झीगु स्वनिगः)

नेपाली कांग्रेसया शनिवाःनिसें न्ह्यानाः निन्हु दुखुन्हु म्हिगः आइतवाः काभ्रेया धौख्यलय् भेला क्वचाःगु दु । उगु भेलाय् कांग्रेसया केन्द्रीय दुजःत नाप नापं जिल्ला सभापतितय्सं ब्वति काःगु खः । भेलां स्वंगू दलया दथुइ जूगु न्यागू बुँदाया सहमति इलय् हे कार्यान्वयन मयात धाःसा शान्तिपूर्ण लोकतान्त्रिक आन्दोलन यायेगु धकाः प्रस्ताव तकं पारित यानाः म्हिगः आइतवाः धौख्यलय् समापन समारोह यात । कांग्रेसया बरिष्ठ नेता शेरबहादुर देउवा व संसदीय दलया नेता रामचन्द्र पौडेलं न्वंवानादीगु उगु ज्याझ्वलय् पार्टीया केन्द्रीय महासमितिया बैठक सःतेगु धकाः तकं निर्णय याःगु दु । संविधानसभाया म्याद भदौ १४ गते तक जक दुगु जुयाः भदौया न्हापांगु वालय् हे अथे महासमितिया बैठक सःताः अनंलिपाया रणनीति तयार यायेगु जुइ धकाः नं धाःगु दु । अथे हे एकीकृत माओवादीं कब्जा यानातःगु धाःगु सम्पत्ति लित कायेकेगु, नेपाली कांग्रेसं संविधानसभाया म्याद थप याये न्ह्यः तःगु १० बुँदाया प्रस्तावयात तकं कार्यान्वय याकेगु नितिं कांग्रेसं भूमिका म्हितेगु धकाः खँ क्वःछ्यूगु दु । उगु राष्ट्रिय स्तरया भेलाय् कांग्रेसया जिल्ला सभापतितय्सं स्वंगू दलया दथुइ गुगु कथं न्यागू बुँदाया सहमति जुल उगु कथंया सहमति यायेगु अधिकार सुनां कांग्रेया नेतृत्वयात बिल धकाः तकं न्ह्यसः तयेगु ज्या याःगु खः ।

एकीकृत माओवादी नापं वर्तमान सरकारयात छगू कथं ख्याच्वः बिइत हे अथे कांग्रेसं अथे भेला याःगु खः धकाः मनूतय्सं धयाहःगु दु । थ्व हे दथुइ कांग्रेसया उगु भेलाया न्हापांगु दिनय् हे केन्द्रीय नेता गगन थापां जातीय आधारय् स्वायत्त प्रदेशत दयेकेगु अस्वीकार यानाः राज्य पुनर्संरचनाया प्रस्तावया खाका प्रस्तूत याःगु खः । नेवाः स्वायत्त प्रदेशयात नं अस्वीकार यानातःगु उगु प्रस्तावय् मुक्कं यानाः भौगोलिक आधारय् ७ गू प्रदेश दयेकेगु धकाः न्ह्यथनातःगु दु । प्रदेशतय्गु नांया बारे धाःसा स्पष्ट यानातःगु मदु । उकिं कांग्रेसं आः जातीय स्वायत्त प्रदेशयात तप्यंक हे अस्वीकार यानाः वनी धकाः मनूतय्सं तिप्पणी यानाहःगु दु । उगु प्रस्तावयात कयाः आः केन्द्रीय कमिटीं निर्णय याइ धाःगु दु ।