जुस त्वनाः रामदेवं अनसन त्वाःथल

भ्रष्टाचारया विरुद्ध व विदेशय् च्वंगु हाकुगु धन लितहयेमाःगु माग यासें अनसनय् च्वनाच्वम्ह योग गुरु रामदेवं थौं अनसन त्वाःथलादीगु दु । अनसनय् च्वनाच्वंगु गुन्हुया न्हिं आध्यात्मिक गुरु रविशंकरं वय्कःयात जुस त्वंकाः अनसन त्वाःथःगु खः ।

देरादुन अस्पतालय् भर्ना जुयाच्वम्ह ४६दँया रामदेवं थीथी धार्मिक व आध्यात्मिक गुरुतय् न्ह्यने आइतवाः सुथय् अनसन त्वाःथलादीगु खः । अनसन लिपा वय्कःया स्वास्थ्य उपचारय् संलग्न डाक्टरतय्सं वय्कःयात निन्हु-स्वन्हु लिपा अस्पतालं डिस्चार्ज यायेगु जानकारी बिउसें योग गुरुया स्वास्थ्य अवस्था सामान्य जूगु खँ धाःगु दु । गुन्हु न्ह्यः निसें अनसनय् च्वनादीम्ह रामदेवया स्वास्थ्य अवस्था स्यनेवं वय्कःयात वंगु शुक्रवाः हरिद्वारस्थित पताञ्जली योगपीथ आश्रमं अस्पतालय् भर्ना यायेत यंकूगु खः ।

रामदेवं अनसन त्वाःथलादीगु इलय् नापं दुम्ह वय्कःया ग्वाहालिमि आचार्य बालकृष्णं रामदेवं थःगु समर्थक व सुभचिन्तकतय् सुझाव कथं अनसन त्वःतुगु धयादिल । तर बालकृष्णं रामदेवं अनसन त्वःतुसां भ्रष्टाचार व विदेशय् दुगु हाकुगु धन राष्ट्रियकरण यायेत वय्कः अन्तिम ई तक ल्वानाच्वनीगु धयादिल ।

गुन्हु न्ह्यः रामदेवं भारतया राजधानी न्हू दिल्लीस्थित रामलीला मैदानय् च्वनाः अनसन सुरु यानादीगु खःसा लिपा सरकारं वय्कःयात अनं चीकाः हरिद्वार थ्यंकेवं वय्कलं थःगु हे आश्रमय् अनसनयात निरन्तरता बियादीगु खः ।

More Stories Like this