'दोषी' प्रहरीतय् हारगुहार
यथार्थ खँ पित हयेत पुलांपिं हाकीमतय्त इनाप
येँ (सन्ध्या टाइम्स)/सुडान घोटालाय् संलग्न जूगु अभियोगय् अख्तियार दुरुपयोग अनुसन्धान आयोगं विशेष अदालतय् मुद्दा दायर यानातःपिं प्रहरीतय्सं थौं पुलांम्ह प्रहरी महानिरीक्षक हेमबहादुर गुरुङयात नापलानाः थःपिंत अन्याय जुल धकाः गुनासो याःगु दु ।
येँया हात्तीगैंडाय् च्वंगु गुरुङया छेँय् हे वनाः अभियोग लाःपिं प्रहरी पुचलं थःपिंत अनावश्यक रुपं घोटालाय् साला हःगु खः धासें थ्व प्रकरणया सम्पूर्ण सत्य तथ्य सार्वजनिक याना बी माल धकाः गुरुङयात इनाप याःगु खः। उमिसं गुरुङयात थ्व काण्डय् सुनां सुनां गुलि गुलि ध्यबा नःगु खः थ्व फुक्कं खँ सार्वजनिक याना बीत इनाप याःगु खः ।
थ्व प्रहरी पुचः म्हिगः मेम्ह पुलांम्ह प्रहरी महानिरीक्षक ओम विक्रम राणा व रमेशचन्द ठकुरीयात नाप लानाः उमित नं थःपिनि दुःख प्वंकूगु खः। थःपिंसं राणा व ठकुरीया आदेश पालना यानागु हे आधारय् थःपिं नं दोषी खः धासें भ्रष्टाचारया मुद्दा चले याःगुलिं थःपिं अन्यायय् लात धकाः दुःख प्वंकूगु खः। पुलांम्ह प्रहरी महानिरीक्षक नापलाःवंपिं वहालवाला प्रहरीत थःपिनि मचाखाचा समेत ज्वनाः वंगु खः ।
थ्व प्रकरणय् तत्कालिन गृहमन्त्री कृष्ण प्रसाद सिटौला व भिम रावलया नं ल्हाः दुगु जूगुलिं उमित नं साला हयेमाःगु माग प्रहरी ख्यलं यानाच्वंगु दु। तर उमिसं बयानय् धाःसा मन्त्रीतय् नां काःगु मदु ।
