बस्नेत ओलीयाके दु : गृहमन्त्री
येँ (सन्ध्या टाइम्स)/उपप्रधान नापं गृहमन्त्री कृष्णबहादुर महरां प्रधानमन्त्री झलनाथ खनलायात नापलानाः विराटनगरय् पत्रकार खिमनाथ ढकालयात आक्रमण याःम्ह युथ फोर्स कार्यकर्ता पर्शुराम बस्नेतयात एमालेया हे नेतातय्सं संरक्षण बियातल धकाः असन्तुष्टि प्वंकादीगु दु ।
मन्त्री महरा थौं सुथय् वालुवाटार वनाः युथ फोर्स मोरङया अध्यक्ष पर्शुराम बस्नेतयात एमाले नेता केपी ओलीं संरक्षण बियातःगु दु धासें वयात प्रहरीयात लःल्हायेत इनाप यानादीगु खः। लिसलय् प्रम खनालं अपराधी न्ह्याम्ह हे जूसां वयात फुक्क हे शक्ति छ्यलाः ज्वनेत गृहमन्त्रीयात निर्देशन बियादीगु खः ।
थ्वहे झ्वलय् मेखे नेपाल पत्रकार महासंघं बस्नेतयात ज्वनाः कारवाही यायेत माग यासें चरणबद्ध आन्दोलन शुरु यासें थौं ल्हातय् हाकुगु कापः चिनाः ज्या याःगु दु ।
