कांग्रेसय् नेवाः प्रदेश मदुगु संघीयता प्रस्ताव

येँ (सन्ध्या टाइम्स)/म्हिगःनिसें न्ह्यानाच्वंगु नेपाली कांग्रेसया केन्द्रीय नेता व जिल्ला सभापतितय्गु राष्ट्रिय भेलाय् नेवाः नेतातय्सं राज्य पुनर्संरचनाया सवालय् यदि नेवाः प्रदेश मंत धाःसा थःपिंसं विद्रोह यायेमाली धकाः ख्याच्वः बिउगु दु। काभ्रेया धौख्यलय् जुयाच्वंगु उगु भेलाय् गगन थापां नां न्ह्यमथँसे गुगू प्रदेशया प्रस्ताव तयादीगु खःसा उगु इलय् नेता व कार्यकर्तातय्सं पार्टीया केन्द्रीय कमिटीइ हे सहलह मब्याकुसे अज्याःगु प्रस्ताव हल धकाः कचमच तकं याःगु खः। वहे इलय् नेवाः कार्यकर्तातय्सं यदि नेवाः प्रदेश मंत धाःसा विद्रोह जुइ धकाः पार्टीया नेतातय्त ख्याच्वः बियागु खँ कांग्रेस येँ जिल्लाया सभापति भिमसेनदास प्रधानं धयादीगु दु। पार्टीया राज्य पुनर्संरचना सम्वन्धि सुझाव समितिपाखें नेता थापां न्ह्यब्वःगु न्हय्गू प्रदेशया प्रस्ताव भौगोलिक आकार, पहिचान, आर्थिक सम्भाब्यता लागायतया आधारय् हःगु खः ।

उगु भेला थौं नं न्ह्यानाच्वंगु दु। थौं हे बहनी क्वचाइगु भेलाय् न्ववानादीपिं कांग्रेसया अप्वः जिल्ला सभापतितय्सं स्वंगू दल दथुइ जूगु न्यागू बुँदाया सहमतियात आलोचना यासें माओवादीयात निःशस्त्र यायेमाःगु खँय् बः बिउगु खः। जिल्ला सभापतिय्सं स्वलाया दुने माओवादी निःशस्त्र मजुइगु खःसा कांग्रेसं आन्दोलनया तयारी यायेमाः धाःगु खः। भेलाय् चुनावया नितिं तयारी याना वनेमाःगु बिचाः नं नेतातय्सं प्वंकूगु खः। उगु भेला क्वचायेधुंकाः छुं दिं लिपा हे कांग्रेस केन्द्रीय कमिटीया बैठक च्वनीगु जूगु दु ।