नेपाल लिपि गुथिया स्वीनिदँ बुन्हि
येँ (सन्ध्या टाइम्स)/नेपाल लिपि गुथिया स्वीनिक्वःगु बुदिं हन। ज्याझ्वःया उलेज्या यासें मूपाहां नेपालभाषा परिषद्या नायः फणीन्द्ररत्न बज्राचार्यं न्हापा गुरुजुपिंसं जक ब्वने सयेकीगु लिपि थौं न्ह्याम्ह नेवालं नं ब्वने व च्वये दुगु गौरवया खँ खः धयादिल। थौं सकस्यां थःगु पहिचान मालाच्वंगु इलय् नेवाःत लिपि विकास व भाषा संरक्षणया निंतिं जागरुक जुइमाःगु खँ नं वय्कलं कनादिल ।
नेवाः देय् दबूया संरक्षक मल्ल के. सुन्दरं लिपिया स्वापू नेवाः समुदाय, राज्य व राज्यया अधिकारनापं दु धासें नवाःतसें थौं संविधान दुने पिने जुयाच्वंगु षडयन्त्रयात खबरदारी यायेमाः धयादिल ।
सभासद् बुद्ध साय्मिं थौं नेवाः जातिया हे अस्तित्व न्हंकेगु कुतः जुयाच्वंगु इलय् नेवाःत ल्वाये मफुत धाःसा कन्हय् अस्तित्व ल्यनी मखु धयादिल। गुथिया प्राज्ञ प्रतापमान शाक्यं लिपि गुथिं थौंकन्हय् थःगु भवन निर्माणया ज्या पूवंकेगु, लिपि विशेषज्ञपिं तयार यायेगु व प्रचलित लिपि व रंजना लिपियात ईया हिउपाः कथं यूनिकोडय् दुथ्याकेगु थेंज्याःगु महत्वपुर्ण ज्याय् लगे जुयाच्वंगु खँ कनादिल ।
ज्याझ्वलय् येँ मनपा ३० वडा व २७ वडाया पुलांपिं वडाध्यक्षपिं चिनियामान बज्राचार्य व अमररत्न बज्राचार्यपिंसं वडापाखें गुथियात दँय्दसं बीगु नीन्याद्वः तका आर्थिक ग्वाहालि लःल्हानादीगु खः ।
गुथिया नायः शरद कसाः 'कसाःछेँ' अध्यक्षताय् न्ह्याःगु उगु ज्याझ्वलय् दांभरि गोपाल साय्मिं लसकुस यानादीगु खः ।
