पेट्रोल लिटरं १०२ तका !
येँ (सन्ध्या टाइम्स)/नेपाल आयल निगमं थनिंनिसें लागू जुइ कथं पेट्रोलय् हाकनं भाः थकाःगु दु। नेपाल आयल निगमं थनिंनिसें पेट्रोलय् लिटरं न्यातका थकयाः प्रति लिटर १०२ तका थ्यंकूगु दु ।
म्हिगः तक लिटरं ९७ तकां पेट्रोल न्यानाच्वंपिं मोटरसाइकल व गाडी चले याइपिंसं थनिंनिसें लिटरं न्यातका थपे यानाः १०२ तकां न्याये मालीगु जूगु दु।
आयल निगमया वंगु शुक्रवाः च्वंगु संचालक समितिया बैठकं थनिंनिसें पेट्रोलया भाः थकायेगु निर्णय याःगु खः।
पेट्रोलया भाः १०२ तका थ्यंगु आः तकया हे दकलय् अप्वः खः। वंगु स्वदँ न्ह्यः जेठ २७ गते पेट्रोलया भाः लिटरं १०० तका थ्यंगु खः ।
निगमं डिजेल, मचिकं व एलपी ग्याँसया भाः धाःसा थकाःगु मदु। डिजेल व मचिकं प्रति लिटर ६८ तका व छम्वः (६८/५० तका) हे कायम याना तयागु खँ निगमं धाःगु दु। अथे हे एलपी ग्याँसया भाः नं प्रति सिलिण्डर १,३२५ तका हे कायम यानातःगु दु ।
अन्तर्राष्ट्रिय बजारय् पेट्रोलया भा थहां वःगुलिं निगमं बाध्य जुयाः समायोजन यायेत भाः थकायेमाःगु खँ न्ह्यथंगु दु। आयल निगमं थौंकन्हय् लच्छिया ५० करोड तका घाटा फये मालाच्वंगु खँ न्ह्यथंसें भाः थकायेत इनाप यानाच्वंगु खः ।
