भदौ १ गते गज्याःगु मस्यौदा वइगु थें?

राजनीतिक पार्टीतय्सं थ्वहे वइगु भदौया न्हापांगु वालय् संविधानया न्हापांगु मस्यौदा तयार यायेगु समयतालिका दयेकूगु दु। स्वलाया दुने संविधानया न्हापांगु मस्यौदा तयार हे यायेगु धइगु बचं सहित संविधानसभाया म्याद थपे याःगु कारणं पार्टीतय्सं उगु स्वला क्यने स्वयां बाःछि न्ह्यः हे न्हापांगु मस्यौदा तयार यायेगु समयतालिका दयेकूगुलिं आः चाहिं पार्टीतय्सं संविधान दयेकेगु ज्या धाथें गम्भीरतापूर्वक हे याइगु खः लाकि धइगु संकेत पिहां वःगु दु। थुकिं आः थुमिसं संविधान दयेकः नइ मखुत धकाः निराश जूपिं जनतायात छुं भचा राहत बिउगु दु ।

तर दलतय्सं भदौ १ गते संविधानया न्हापांगु मस्यौदा तयार यायेगु धाःसां उगु मस्यौदा गज्याःगु जुइ धइगु खँ धाःसा धाःगु मदुनि। उगु मस्यौदा पूर्ण संविधानसभाया मस्यौदा जुइ लाकि अपूर्ण मस्यौदा जुइ धइगु न्ह्यसः ल्यना हे च्वंगु दनि। थ्व न्ह्यसः वःगुया मू कारण छु धायेबलय् थ्व संविधानय् उल्लेख जुइमाःगु दकलय् आधारभूत बुँदातय् बारे राजनीतिक दलतय् दथुइ मतैक्य जुइ मफुनि। न्हापा व आःया संविधानया जनतां महसुस हे जुइक वइगु मू हिउपाः धइगु हे राज्यया पुनर्संरचना, शासकीय प्रणाली व निर्वाचन प्रणाली खः। थ्व खँ हे आः तक गज्याःगु जुइ धकाः क्वःछी मफुनि। थज्याःगु खँयात आः तयार जुइगु संविधानया मस्यौदाय् गय् यानाः संवोधन याइगु खः व धाये मफुनि। छुं जुयाः थुपिं खँ निर्णय याये मफुत धकाः अपूर्ण मस्यौदा तयार यात धाःसा उकियात जनतां अस्वीकार याइगु खँयात दलतय्सं थुइकेमाः। संविधान दलतय् छिंछिं थे दयेकीगु दस्तावेज मखु ।

More Stories Like this