मैत्रय बुद्ध झी दथुइ हे दी - ५

बिनोद साय्मि (आल)

चमत्कारत
द्यःमां, द्यःभाजु, बैद्यपिंके द्यः दुबिनाः आपालं ल्वय्, समस्या, कचवं मदयेकाः मनूतय्गु सेवा यानाच्वंगु ला झीगु नितिं न्हूगु खँ मखु। अथेहे झीसं धायेगु याना कि मस्तय्के नं द्यः दुबिनाच्वनी। महात्मात/द्यःत, तःधंपिं भन्ते, गुरुपिं छेँय् वल कि छेँ हे पवित्र जुइ। द्यःत फ्वगिं, जोगी, गरिबया भेषय् वइ। देशय् संकट वल कि द्यःयाके चःति वइगु बुखँ झीसं ब्वनागु दु। बुंगद्यः वा जनबहाद्यःया खः क्वःदलाः 'अनिष्ट' जूगु नं झीसं खना हे च्वना ।

झीसं द्यःया थासं हयागु जल, वा गुगुं सराद्ध पुजा आदि जूसां जलं छेँ, थाय्बाय् नापं थःत नं शुद्ध यायेत हाहा यायेगु व त्वनेगु याना। अथेहे मूमू तिथि लाकाः तिर्थ, कुण्डय् वनाः म्वः ल्हुइगु याना। थथे यायेगुया मू कारण द्यः महात्मा पिनिगु दैवी शक्तिं अनया लःयात म्याग्नेटाइज याना तइगुलिं खः। थुज्वःगु ज्ञानयात थौंतक बिकास जुइधुंकूगु मनूया बिज्ञानं थी मफुनि। भलसा काये कन्हय् गुगुं इलय् बिज्ञान नं अन तक थ्यनी जुइ ।

झीसं थःगु जीवनय् सदां हे याना, खना व न्यना वयाच्वना सिबें नं अझ फरक कथंया चमत्कारत थौंकन्हय् कुहां वयाच्वंपिं मैत्रय, महात्मापिंसं याना वयाच्वंगु दु। मैत्रय व महात्मापिनि चमत्कार झीसं गबलें गबलें न्यँकँ बाखनय् न्यना थें जक मखु गबलें मन्यना थें नं जू। छुं दसु न्ह्यब्वये:
१) सन् १९८८ जुन ११ य् मैत्रय दकलय् न्हापां पिहां वःबलय् केन्याया नैरोबीइ फसं तुं पिलू वयाः स्थानीय स्वाहिल भासं खँल्हाबल्हा यानाः हानं फसय् तुं बिना वंगु खः। मैत्रय व महात्मापिं तःकथंया भेषय् पिहां वयेगु नापं मनूतय्त आपत बिपतय् ग्वाहालि नं याइगु रिपोर्ट जूगु 'सेयर इन्टरनेशनल' पती पिदंगु दु। किपा १ सन् १९९८ मे, इटली फ्लोरेन्सया खः। थन ल्यासेम्ह मिसाया भेषय् मैत्रय खःसा मचाया भेषय् महात्मा जेसस खः। छम्ह जर्मन च्वमिं थ्व किपा कयाः थथे च्वल !... वा वयाच्वंगु खिउँगु चान्हय्.....जिं चीधिकःम्ह छम्ह मचा बँय् च्वनाच्वंगु खना.. मचाया लिक्कं ल्यासेम्ह वया मां जुइमाः, छम्ह फ्वगिं। लँय् फ्यतुनाः ध्यबा फ्वनाच्वंम्ह मां म्ह्याय् खनाः जितः नुगलय् लुल "व चीधिकःम्ह मिसा मचाया ख्वाःया भावय् थ्व संसारया लसता व न्हिला पिज्वयाच्वंगु दु। ..... गुज्वःगु सुखद व दुःखया लु छगू हे इलय् छगू हे थासय् प्यपुनाच्वंगु" झीसं थन दयाच्वंगु गरिबी तंकेमाः।" बेन्जामिन क्रेमं लिपा क्वःछिनादिल कि किपाय् दुपिं मांया भेषय् मैत्रय व म्ह्याय्या भेषय् महात्मा जेशस खः।
२) सन् १९८८ य् मैत्रयं जःया क्रस व व जःया चाकलाःगु बां (किपा: २) क्यनादिल। थ्व जःया क्रस दकलय् न्हापां लस एन्जलसय् क्यन सा वया लिपा विश्वया थीथी थासय् नं खने दत।
३) सन् १९९१ य् मैत्रयं ततःधंगु धार्मिक ज्याझ्वलय् खने दयेकः वनेगु शुरु यात। थथे वनेबलय् वय्कलं लिक्कसं दुगु त्वनेगु लःया श्रोत गथे कि पुखू, बुंगाः आदिया लखय् दुःख, ल्वय् लायेके फइगु गुण दयेक म्याग्नेटाइज याना थकेगु यानादिल। दकलय् न्हापा थथे तलकोटी, मेक्सिकोया लखय् यानादिल। थ्व खँ सिउपिं आपाःसिनं ततःग्वःगु लः थल ज्वनाः लः फया कायेत मनूत म्वःम्वः झ्वःछू वल। थुकथं लः म्याग्नेटाइज यायेगु ज्या जर्मनीया नोर्डेनाउ, भारतया नडानाय् याःगु दु। थुकथं म्याग्नेटाइज यानातःगु लखं आपाःसिया ल्वय् दुःखः मदया वंगु रिपोर्ट वःगु दु। लिपा तक विश्वया मुक्कं ७७७ गू थासय् थुकथं मैत्रयं म्याग्नेटाइज यानातःगु त्वनेगु लःया श्रोतत दइ तिनि ।

(कथहं)

More Stories Like this