मिसा हस्तकला धेंधेंबल्लाः कासा क्वचाल

टोखा (झीगु स्वनिगः)

'स्थानीय हस्तकलाया संरक्षण - प्रबर्द्धन व मिसा विकासया नितिं' धइगु नारालिसे म्हिगः टोखाय् न्हापांगु महिला पराल तथा छ्वाली हस्तकला प्रतियोगिता रु- २०६८ क्वचाःगु दु । उत्प्रेरीया मिसा समूह, टोखां थ्व ज्याझ्वःया ग्वसाः ग्वःगु खः । धेंधेंबल्लाः कासाय् स्थानीय सु लिसे छ्वाली छ्यलाः थःपिनिगु परम्परागत लिसे मौलिक कलापाखें न्हियान्हिथं छ्यलाबुलाय् वइगु वस्तुत दयेके ब्यूगु खः । टोखाया जीवित देवीत गणेश व कुमारीया मू पाहासुइ क्वचाःगु उगु ज्याझ्वलय् टोखाया पीम्ह प्रतियोगी मिसापिनिगु ब्वति दुगु खः । थज्याःगु ज्याझ्वलं आधुनिकताया नामय् परम्परागत लिसे मौलिक कलायात बेवास्ता यानाच्वंगु थौंया पुस्तायात थःगु पुर्खाया कला व संस्कृतिया बारे जानकारी ब्यूसें उकिया संरक्षण व सम्बर्द्धनय् तिबः बिइत ज्याझ्वःया ग्वसाः ग्वःगु समूहया नायः धर्मदेवी श्रेष्ठं धयादिल । धेंधेंबल्लाः कासाय् मुति डंगोल, मुतिमाया श्रेष्ठ व अष्टमाया श्रेष्ठ छसीकथं न्हाप, ल्यू व लियांल्यूया सिरपाः त्याकेत ताःलाःगु खः ।