अस्तित्वया न्ह्यसः

- सुधीर 'ख्वबि’ -

वाउँसें हलं
छाय्पिइकाच्वंम्ह सिमाया ख्वाः
छकलं म्हासुसे च्वनावल
न्ह्यःने पा पाछायावःम्ह
मनू खनेवं ।

छगू स्वां क्यबया स्वांतय् दथुइ
खैलाबैला जुल, छकलं
च्यापाः झिपाः ल्हाःपातं
इमिगु गःपः म्वयथल
छाती दुने मुलु दुछ्वया माःहना बिल
शहीदया किपालय् थ्यने न्ह्यः हे
इपिं शहीद जुइधुंकल ।

स्वांमा दक्व सुकू गनावं
स्वां दक्व झ्वा जुयावनाच्वन
भम्बः इसथिस जुयाच्वन
वं थुइके मफयाच्वन
थःगु संसर्गय् ह्वयावइगु स्वां
थौंकन्हय् सुकू गनीगुया हुनिं
थः भाइरसं आक्रान्त जुयाच्वंगु
सिइ हे मस्यूगु जुयाच्वन ।

छप्पा, छधी जुइगु लागि
माकःतय्सं नं होम याइगु जुल
चिकिचाकूगु कोथा दुने
झ्याः लुखा गल्लाक तिनाः
होमया ज्या न्ह्याकाच्वन ।
थाय्ला तस्सकं कयेकुन
छम्ह निम्ह मनुखं पिनें थःगु सः तल
थुकिया प्रतिक्रिया थुकथं वल -
पाकःख्वाःतय्गु स्वभाव थथे हे खः ।

More Stories Like this