पत्रकारत असुरक्षित

राज्य व्यवस्थाया प्यंगूगु अंगकथं कयातःगु पत्रकारिता क्षेत्र थौ सुरक्षित मदु । पत्रकारिताया धर्म निर्वाहयायेगु झ्वलय् विनाकारण पत्रकारतय्सं थःगु ज्यान तकं तंकेमाला च्वंगु दु । पत्रकारतय्त ख्याच्वः, धाक धम्की जक वीगु यानाच्वंगु विगतया रेकर्ड हे त्वाथलाः थौं कन्हय् सांघातिक आक्रमण या शिकार जुयाच्वनेमाःगु दु पत्रकारत । हालै तिनि छगू न्हिपौया पत्रकार खिलनाथ ढकालयात एमालेया भातृसंगठन युवा संघया स्थानिय नेता पुर्शराम बस्नेत व मनोज राइयात घटनाया दोषी धकाः म्हसीकेगु ज्या जुइ धुंकूसां एमालेया विवादास्पष्ट नेता केपी शर्मा ओलीं अपराधीतय्त संरक्षण वियाः तयातःगु खँ सार्वजनिक जूगु खः । पत्रकारतय् थुगुकथं बांमलाक्क दाइपिं एमालेया युवा संघया थुगु अपराधिक हरकटयात नेतातय्सं न्ह्याक्कोहे संरक्षण वियाः कानूनयात ल्हातय् कायेत स्वःसां पत्रकारत सुम्क च्वनीगु खँहे जुइमखु । पत्रकारीता नाप सम्वन्धित संघसंस्थां नं थुगु कथंया अपराधिक घटनाया भण्डाफोर यायां न्यायया नितिं सः थ्वयेकेगु यायेमाः । थौं छगू न्हिपौया छम्ह पत्रकारयात जुल थःयात इ धकाः मात्रै तामासा स्वयेगु ज्या याये मज्यू । न्याइम्ह खिचा व ला नइम्ह धुं थःयात नं न्याः वयेफु धयागु सम्भावनायात लोमंके मज्यू ।केपी ओली वहे नेता खः, गुम्हय्स्यां एकीकृत नेकपा -माओवादी) या भातृसंगठन वाइसिएल यात भंग यायेमाः धकाः माग तःम्ह खः । एमालेया युवा संघ धा वा युथ फोर्स सर्वसाधारण जनतां निसे पत्रकारतय्त थुकथं अपराधिक ज्यायात निरन्तरता विया वयाच्वंगु दु । मेपिं ला कतः जुल एमालेया भातृ संगठन थुमिसं खुद पार्टीया न्वकु वामदेव गौतमयात तक बांकी मतः । गौतमयात थःगुया मातृसंगठनं स्यायेगु तकंया ख्याच्वः विल ।

वाइसिएलं ला उज्वःगुकथंया ज्या गवलें मयाः विकास निर्माणया ज्याय् सकृय वाइसिएल । उज्वःगु संस्थाया विघटनया मांग याइम्ह ओलीथें याःम्हं युथ फोर्स व युवा संघया अपराधिक घटनायात समर्थन यानाः अपराधीतय्त सुरक्षा बीम्हं ओलीया नैतिकतायात कयाः शंका मयासे मज्यूगु दु । वाइसिएल धयागु कम्युनिष्टतय्गु मूल्य व मान्यता दुने लाः । तर युवा संघ व युथ फोर्स छगु गुगू सिद्धान्त दुने लाः सीकेत थाकुयाच्वन । सैद्धान्तिकरुपं संशोधनवादीइ फसय् जूम्ह एमालें थःगु भातृसंगठन छाय् दयेका तल ? सर्वसाधारण जनता व पत्रकारतय्त थुकथंहे दायेगु ख्यायेगु ज्या यानाच्वन धाःसा युथफोर्स व युवा संघ जक मखु खुद एमालेया नितिंहे अनुत्पादक जुइगु निश्चित खः । वाइसिएलया देखासिकी जक याये धयां मज्यू, संगठन सिद्धान्त अन्तर्गत जुइमाः । मखुसा युथफोर्स दयेकी व युवा संघ अपराधिक समुहलय् रुपान्तर जुइत लिवाइमखु । अथ्यहे अपराधीतय्त संरक्षण वियाः सुंनं नेतां कानून ल्हातय् कायेगु ज्या यायेमज्यू । अपराधीयात संरक्षण वीगु धयागु अपराध यायेगु सरह खः । एमाले दुने ओलीयात कारवाही यायेमाः धाःथें आः पिनेनं ओलीया विरुद्ध सः थ्वयेफु । जनआन्दोलन विरोधी ओलीयात पाता कसय् याइगु अवस्था नं मवइ धकाः धायेफै मखु ।

More Stories Like this