थीत्यःमत्यः चीकेत केन्द्र पलिस्था यायेगु जुइ

येँ (झीगु स्वनिगः)

उप प्रधान नापं गृह मन्त्री कृष्णबहादुर महरां वर्तमान सरकारं थीत्यःमत्यः व जातीय विभेद चीकेगु नितिं केन्द्रीय स्तरय् निगरानी केन्द्र पलिस्था यायेगु जुइ धकाः धयादीगु दु । उगु केन्द्र गृह मन्त्रालयसं जुइ धकाः नं वय्कलं धयादीगु दु । संसद्या महिला बालबालिका तथा समाजकल्याण समितिं म्हिगः शनिवाः सहलहया नितिं सःतूगु ज्याझ्वलय् न्वंवासें वय्कलं अथे धयादीगु खः । गृह मन्त्री महरां धयादिल 'जातीय भेदभाव व थीत्यःमत्यःया अपराध निगरानी केन्द्र स्थापना यायेगु जुइ ।'

थीत्यः मत्यः व भेदभावया अनुगमन यायेत याकनं हे केन्द्र पलिस्था यायेगु जुइ धयादिसें वय्कलं केन्द्रपाखें हे उकियात कयाः अनुगमन याइ धयादिल । जातीय भेदभाव व थीत्यः मत्यःया समस्या समाधान यायेगु नितिं सरकारं यानाच्वंगु ज्याया बारे जानकारी बिइत समितिं गृह मन्त्री नापं गृह सचिव लिलामणि पौडेलयात सःताः सहलह ब्याकूगु खः । उगु ज्याझ्वलय् गृहमन्त्री महरां दलित व मिसापिन्त जुइगु भेदभाव व थीत्यःमत्यःयात चीकेत विगतय् जूगु घोषणायात कार्यान्वयन यायेगु नापं व सम्वन्धि कानुनयात कडाइका साथ लागू यायेगु धकाः प्रतिबद्धता नं प्वंकादिल ।