पत्रकारतपाखें आन्दोलनया घोषणा
येँ (झीगु स्वनिगः)
विराटनगरया पत्रकारयात आक्रमण याःगु घटनाया विरोधय् नेपाल पत्रकार महासंघं चरणबद्ध आन्दोलनया घोषणा याःगु दु । एमालेया युथ फोर्सया मोरङ नेता परशुराम बस्नेतया योजना कथं पत्रकार खिलनाथ ढकालयात आक्रमण याःगु घटनायात कयाः पत्रकारतय्सं तःन्हु न्ह्यःनिसें विरोध यानाः वयाच्वंगु खःसा म्हिगः शनिवाः जक महासंघया आकस्मिक मुँज्या च्वनाः चरणबद्ध आन्दोलन यायेगु घोषणा याःगु खः । आन्दोलनया ज्याझ्वः कथं जेठ २९ गतेनिसें ३१ गते तक हाकूगु कापः चिनाः ज्या यायेगु, असार १ गते येँया माइतिघर मण्डला व जिल्ला प्रशासन ज्याकू न्ह्यःने धर्ना च्वनेगु, २ गते सम्पादकतनाप व ३ गते ट्रेड युनियननाप अन्तक्रिर्या यायेगु व ४ गर्ते देय्न्यंकं पं्रदर्शन यायेगु धकाः खँ क्वःछ्यूगु खः । थ्व हे झ्वलय् नेपाल पत्रकार महासंघया मिसनं पत्रकार ढकालयात युथ फोर्स मोरङया नायः परशुराम बस्नेतया पुचलं हे आक्रमण याःगु खः धकाः निष्कर्ष पिकाःगु दु । बस्नेत उगु लागाया गुण्डाया नाइके धकाः तकं धाःगु दु ।
