प्यम्ह नेताया खँ प्यखे स्वःल

येँ (झीगु स्वनिगः)

प्रमुख प्रतिपक्ष दल नेपाली कांग्रेसया मूमू प्यम्ह नेतातय्सं वर्तमान राजीतिक अवस्था नापं स्वंगू दलया दथुइ जूगु न्यागू बुँदाया सहमतियात ब्यागलं ब्यागलं कथं ब्याख्या यानाः आः न्हूगु कथं वनेगु विषययात कयाः नं ब्यागलं ब्यागलं बिचाः प्वंकादीगुलिं स्वयं कांग्रेसया हे नेता कार्यकर्तात अजूचाःगु दु । काभ्रेया धौख्यलय् म्हिगः शनिवाःनिसें कांग्रेसया केन्द्रीय दुजः नापं देय् न्यंकंया जिल्ला सभापतिय्गु भेलाय् न्वंवायेगु झ्वलय् नेतातय्सं अथे न्वंवानादीगु खः । कांग्रेसया उगु भेला थौं आइतवाः तक न्ह्याइ धकाः धाःगु दु । उगु ज्याझ्वलय् न्वंवायेगु झ्वलय् पार्टीया सभापति सुशील कोइरालां पार्टीं सिद्धान्तया अःखः छुं नं दललिसे सम्झौता यायेगु जुइमखु धकाः धयादीगु दु । उगु भेलां पार्टीया रणनीति तयार यायेगु जुइ धकाः धयादिसें वय्कलं लोकतन्त्रया हित अःखः पार्टी वनीमखु धकाः धयादिल । नेता कोइरालां शान्ति प्रक्रिया माओवादीया हे कारणं न्ह्याः वनेमफयाच्वंगु खः धकाः दावी तकं यानादिल । पार्टी दुने आन्तरिक रुपं विवाद जुयाच्वंगु इलय् वय्कलं कांग्रेस व्यक्तिवादी प्रवृतिं चले जुइमखु धकाः तकं धयादिल ।

अथे हे नेपाली कांग्रेसया वरिष्ठ नेता शेरबहादुर देउवां स्वंगू दलया दथुइ जूगु न्यागू बुँदाया सहमति आःया हे अवस्थाय् कार्यान्वय जुइमखु धकाः तकं दावी यानादिल । वय्कलं संविधानसभाया म्याद थप जूगु स्वला अथे हे सितिं वनीगु आशंका यानादिल । नेता देउवां न्यागू बुँदाया सहमतियात कयाः आलोचना यानादिसें आः कांग्रेसं चुनावया नितिं तयारी यायेमाः धकाः नं बहः बियादिल । कांग्रेसया सभापति कोइरालां याःगु न्यागू बुँदाया सहमतियात कयाः आलोचना यानाः वयाच्वंम्ह पार्टीया वरिष्ठ नेता देउवां पार्टी दुने मतभेतय् सत्तापक्ष व प्रतिपक्षं थवं थवय् कदर यानाः सहमति यायेमाः धकाः तकं बहः बियादिल । ग्रेसया संसदीय दलया नेता रामचन्द्र पौडेलं भेलाय् न्वंवायेगु झ्वलय् लोकतन्त्रया रक्षाया नितिं कांग्रेसं संघर्ष यायेत तयार यायेमाः धकाः धयादिल । वय्कलं उकिया नितिं माःगु कथं तयार जुइत इनाप तकं यानादिल । उगु ज्याझ्वय् कांग्रेसया महामन्त्री कृष्ण सिटौलां लोकतन्त्रया मूलभूत विषयसं हे सहमति जूगु मदुनि धकाः नं धयादिल । वय्कलं न्यागू बुँदाया सहमति कथं स्वलाया दुने सहमति जुइ मफत धाःसा संविधान तकं दयेके फैमखु धकाः दावी यानादिल । कांग्रेसया उगु भेलाय् पार्टी संचालन विधि नापं पार्टीया आन्तरिक विवादयात कयाः नं समाधान यायेगु नापं अनंलिपा हाकनं केन्द्रीय समितिया मुँज्या तकं च्वनी धकाः कांग्रेसया नेतातय्सं धयादीगु दु ।