सिन्धुपाल्चोकय् नेवाः मुँज्या

वंगु सोमवा: (तछलाथ्व पञ्चमी) कुन्हु सिन्धुपाल्चोकय् नेवाः मुँज्या जुल । सिन्धुपाल्चोकया सदरमुकाम चौतारास्थित जिल्ला विकास समितिया हलय् जूगु उगु ज्याझ्व:या उलेज्या नेवाः देय् दबूया नायः नरेश ताम्राकारं यानादीगु ख: ।

ज्याझ्वःयात सम्बोधन यानादिसें देय् दबूया नायः ताम्राकारं नेवाःतय्सं व्यक्तिगत स्वार्थया राजनितियात त्व:ता राष्ट्रया विकास व नेवाः समुदाय हक अधिकारया सुनिश्चितया निंतिं छधीछप्पँ जुइमा:गु खँय् ब: बियादिल । वय्कलं सिन्धुपाल्चोक ऐतिहासिक नेपालमण्डल दुने दुथ्या:गु लागा जूगु धयादिसें आ: निर्माण जुइगु प्रदेशय् थुगु लागा गन च्वनीगु खः धका सहलह ब्याकेत हथाय् जुइधुंकूगु धयादिल ।

सिन्धु नेवाः खलया नायः भाजु माधव कर्माचार्यया नायःसुइ न्ह्या:गु उगु ज्याझ्वलय् नेवाः देय् दबूया न्वकू विजयप्रकाश तण्डुकार, नेवा: विद्यार्थी दबूया छ्याञ्जे निकेश महर्जन, नेपाल पत्रकार महासघंया पार्षद् जीवन कक्षपति, नेवाः देय् दबू इलामया छ्याञ्जे कमल श्रेष्ठ नापं सिद्धि नारायण श्रेष्ठ, रत्नप्रसाद श्रेष्ठपिंसं थ:थ:गु नुग: खँ प्वंकादीगु खः ।

More Stories Like this